Un di e promé desishonnan di e Gobièrnu aktual tabata pa instalá un komishon pa revisá desishonnan hasí den kuadro di ‘polítika di despedida’ di e Gobièrnu anterior. Resientemente e komishon aki a raportá na e minister konserní ArminKonket i na konseho di minister.
E komishon ta avansando ku su trabounan, ounke no na e velosidat ku Minister ArminKonket ta deseá. Te ku 29 di desèmber 2017 e komishon a kaba ku revishon di180 di e 334 desishonnan ku e mester revisá. Kasi mitar di e 180 kasonan aki no tabata kumpli ku lei, regla i òf prosedura aplikabel.Fin di febrüari awor e komishon ta kompletá su trabou.
Polítika di despedida
Polítika di despedida ta referí na un práktika di gobièrnunan di kual nan dianan ta kontá i ku ta tuma desishonnan den pitu, sin tene kuenta ku proseduravigente i sin informá esnan ku formalmente ta na enkargo di e servisionan en kuestion. Konsekuensia di e práktika aki ta ku mandatarionan nobo, ku probablemente lo disidí otro, ta keda konfrontá ku un echo irevokabel. Un echo kual tin konsekuensia riba e medionan públiko skars ku nos ta disponé di dje. Korte di hustisia ta di opinion ku tipo di desishon asina ta nulo.
Kasi mitar di e 180 kasonan ku a keda tratá te ku fin di aña pasá ta kasonan ku por keda konsiderá di ta kai bou di polítika di despedida. Mayoria di e kasonan aki ta bai over di promoshon (49%), nombramentu den funshon (25%) i dunamentu di gratifikashon (15%).
Falta 154 kaso mas pa atendé pa fin di febrüari
E komishon a risibí en total 334 petishon pa revisá. Mayoria ta trata di kasonan di nombramentu den funshon (benoeming) i dunamentu di promoshon (bevordering). Falta 154 kaso mas pa kaba di atendé. Ta pone mas huristadisponibelpa e komishon por kompletá nan trabou pa fin di febrüari awor.
