Awe a kuminsá ku un variante di e ‘Walk for the Roses’, preparando pa e di-15 aniversario di fundashon Ride for the Roses Curaçao (RFTRC) na yanüari 2019.
Vise presidente Curd Evertsz di RFTRC a tuma riba dje pa kana 1000 kilometer te yanüari awor. Na mes momento esaki mester generá ‘standing order’ nobo na bankonan lokal na fabor di RFTRC. E Standing Order 1000 plan aki lo krea un fluho kontinuo di entrada pa RFTRC i e ta simbolisá e balor di keda kana i e lucha konstante kontra kanser.
E posibilidat tabata eksistí kaba pa persona i institutonan atraves di un standing order tur luna traspasá un sierto suma di plaka pa e fundashon. Esaki por ta un fuente muchu mas importante i interesante pa e esfuersonan ku ta desplegá tur aña ku Ride-Sail-Swim-Walk for the Roses. Na tur banko lokal por haña formulario pa yena un standing order, pero mas ku klaro ku RFTRC gustosamente tambe ke yuda ku e formulario pa e banko di kada ken su preferensia. E donatùr ta yena e formulario i e ta outorisá su banko pa traspasá tur luna un sierto suma pa RFTRC. E no rekerí niun paso adishonal i por kontrolá e traspaso tur luna, sin mas papelucho. Pa promové e parti aki di e aktividatnan di rekoudashon di RFTRC, a papia riba un aswerkamentu diferente. Ku respaldo di su médikonan, Curd Evertsz a bini ku e plan pa den e lunanan ku falta e kana 1000 kilometer, pa logra mas tantu standing order posibel.
Konferensia di prensa
Awe Curd Evertsz a kana e promé kilometernan. E salida tabata na ofisina di notario Adèle van der Pluym na skina di Perseusweg, kaminda ofisialmente a registrá e dokomento di e plan ‘SO 1000’ den presensia di RFTRC su presidente Robbin Martina i otro miembronan di direktiva. Despues nan a pasa un ratu na ofisina di Orco Bank ku ta e patrosinador prinsipal di e fundashon kaminda nan a demostrá sosten pa e idea aki, pa djei sigui pa e ofisina di fondo Prinsesa Wilhelmina na Skalo kaminda e momento ei prensa lokal tabata den un konferensia di prensa di RFTRC huntu ku miembronan di direktiva di PWF pa haña splikashon di e novedat. E distansia di alrededor di 7 kilometer di awe a generá mesora e promé standing order-nan nobo pa e RFTRC. Klaro ku de antemano a regla pa e promé kaminata finalisá na Skalo pa e koinsidí ku e konferensia di prensa. En prinsipio Curd Evertsz ta kana e so, pero si mas hende ke kana – loke di mes ta un aktividat sano – esaki ta posibel solamente si nan tambe kolektá standing order nobo pa RFTRC. Por mèldu pa hasi standing orders atraves di e direkshon di e-mail [email protected]. Kaminda ta posibel Curd Evertsz personalmente ta bin buska standing order durante su kaminatanan.
Opviamente lo kontrolá tur e distansianan kaná, i lo log nan atraves di e aparato Vivoactive 3. Esaki a bora realidat danki na Barry Bakker di DASIA ku mesora ofresé di ta patrosinador di e plan SO 1000. Pa e kousa noble aki el a pone e GARMIN Smartwatch disponibel (riba potrèt).
Ku sierto regularidat lo anunsiá kon e progreso di e plan SO 1000 ta bayendo i tin hopi diferente aktividat interesante den tapara pa e plan SO 1000alkansá su ophetivo.
