Den henter educacion di un pais, segun Josette Daal, ta pais Aruba mes mester pone di su banda. Esey ta nifica cu shareholder den enseñansa mester sinta hunto.
Nos tur ta shareholder. E alumno cu ta wordo educa, mañan ta traha p’abo. Abo mester por bisa tambe ki tipo di trahado bo kier. Ta nos tur mester bay kibra cabes kico nos kier pa enseñansa di nos pais. No ta den man di un hende of un grupo di hende so.
Nos mester compronde tambe cu nos pais mester por ofrece diferente tipo di enseñansa. Nos tur ta desea pa nos yiunan, pa e scol y caba un estudio. Nos tur tin yiu y hendenan den nos bida cu no ta riba e mesun nivel. Importante ta, cu nos ta educa un mucha of un alumno, of un studiante, cu e ta contento mañan, den loke e ta haci. E por ta un dokter. E por ta un metsla of e por ta un mecanico por ehempel. Nos mester educa nos muchanan, pa nan ta contento den locual nan ta haci. Trabao honra ta e satisfaccion di mas grandi cu tin , segun Josette Daal. Siña gana bo cen di bo propio sodo.
No por traha ad hoc
Tin hopi cos cu mester wordo atendi y evalua den enseñansa. Por ehempel leynan. Ta bin cu cambionan. Awor aki por mira cu e gobiernonan ta bira mas hoben y e ministernan ta bira mas hoben. Esey ta bon, segun Daal. Esey kiermen cu innovacion ta bin. Nan tin otro forma di pensa. Pero kico ta e innovacionnan cu bo kier introduci den bo pais. Con bo kier introduci innovacion den bo pais. Cu e innovacion cu bo ta trece cun’e, ki resultado bo ta wak, ki vision bo tin pa den futuro. Ta cosnan hopi importante.
Bo no por traha ad hoc, sino bo tin cu traha a base di un vision, segun Josette Daal, directora di SKOA.
Tur dia ta un struggle
SKOA ta struggle tur dia pa cumpli. Por conta riba un man cuanto hende ta traha den e oficina a base di e cantidad di scol cu tin, e cantidad di alumnonan cu tin. Esey caba ta un struggle, segun Daal.
