James Cornelius Jacobus Williams a cumpli 105 aña awe. Un edad hopi bunita y respeta. Pero no ta semper cos tabata color di rosa. Su nieta Melinda Steba ta percura pa tanto su mama como pa su welo. Den 2017 el a bay busca su welo pa e bolbe Aruba. Cu nan dos hunto, e por a cuida di ambos.
Melinda a cana un caminda di cruza pa Williams por keda legal. Nan a bay DIMAS y eynan a bin compronde cu nan no ta tuma hende grandi y a nenga su entrada.
E aña aki a bolbe purba pa inscribi’e y tambe nan a wijs’e af un biaha, mientras cu el a traha mas di 25 aña na Lago y ta haya dos pensioen di tanto Aruba como di Lago.
Famianan a bay corte y cinco minuut prome cu a drenta sala di corte, a core duna Williams permiso pa e aña aki so, cu ta caduca na februari.
Na momento cu a bay inscribi’e cu su papelnan, Censo a bis’e cu e mester di un stempel, cual lo bay dura largo.
Melinda a bisa cu e unico cos cu e welo lo por haci ta sinta warda pa Wardacosta bin sak’e. “Nan mester tin curashi pa saca un homber cu a traha asina hopi aña na Aruba y tur esnan cu tin cu tuma decision p’e, no a ni nace ainda,” e nieta ta conta.
Ta nada mas cu un situacion humanitario cu e por keda cu su famia. Si mand’e bek Suriname, ta den un cas di anciano e tin cu bay. E no tin famia ey. For di tempo e tin 100 aña su nieta ta zorg p’e y e ta contento cu su famia.
Un tiki di Williams
James Williams a bin Aruba cu su 28 aña. Den e prome añanan el a haci trabaonan aki aya. Despues el a cera un contract cu Lago y cu paso di aña el a traha te bira supervisor. Su trabao tabata pa controla stellage prome cu hendenan bay laira. El a traha hopi muebles tambe antes. Williams tabata un bon homber y semper e tabata cla pa otro. E ta miembro di EBG-Kerk y a haci hopi pa e misa na San Nicolas. Tambe el a yuda construi tanto e misa na San Nicolas como Dakota. E no ta un persona desconoci riba e isla.
Williams semper tabata traha. Ainda cu su 99 aña e tabata traha den su hofi. El a cay y a herida su mes. Su nieta Melinda a bisa pa e stop di traha, pasobra ya e ta cla. Nunca Williams a huma, su nieta a relata. El a nace na Coronie, Suriname. Su mama tabata for di India y su tata tabata di Suriname. Si por mira e tempo ey, ta dos idioma diferente. Su bendicion ta cu e por a disfruta di un edad hopi avansa y bunita.
Williams a biba hopi aña na Dakota den Manzanillastraat te ora cu el a baha cu pensioen y a bay bek Suriname.
