Jahmani Eisden y Sheqayli Ascencion ta disfruta y destaca na e International Friendship Camp

Jahmani Eisden y Sheqayli Ascencion, nos Young Ambassadors ta na Rusia destacando durante e International Friendship Camp 2018 na Moscu, Rusia, segun lider di delegacion Monique Ras y Coach Edgar “Gachi” Erasmus.3


E hobennan a participa den diferente tayer, team building training, y tambe training riba tereno. Riba e prome dia tabata tin e apertura y e participantenan a ser conoci cu otro y nan a haci diferente actividad informativo y educativo y nan a haya oportunidad di conta con nan a prepara pa yega Moscu pa participa na e F4F Children’s Social Program.

Riba e di dos dia di Camp Sheqayli a haya les di periodismo y Jahmani training riba tereno cu su team Grevy’s Zebra, preparando asina pa e Football for Friendship World Championship 2018. Sheqayli Ascencion a haya e oportunidad pa sali den un video promocional di F4F haciendo su trabao como reportera y haciendo entrevista cu algun young football players y tambe atletanan grandi cu ta duna sosten na e F4F Children’s Social Program.

Den e video aki tambe por mira Sheqayli ta entrevista nos young football player Jahmani Eisden. Nos ta sumamente orguyoso di Sheqayli y nos ta sumamente contento y orguyoso con nos Young Ambassadors ta destaca entre 211 pais cu ta particpa den e programa F4F Children’s Social Program na Moscu, Rusia.

Pa tur informacion di e eventonan di F4F, por sigui nos young ambassadors via nan Instagram y Facebook page y tambe website y FB Page di Arubaanse Voetbal Bond como tambe e Football for Friendship social media pages (Instagram, Facebook, Twitter y Youtube). Por contact nos young journalist Sheqayli Ascencion via number di Digicel
7312018 pa mas informacion.