Diaranson mainta empleadonan di Island Finance a organisa un evento di sorpresa pa nan hefe, Ivy Simon. E motibo ta e condecoracion Real cu el a ricibi diahuebs mainta for di Gobernador di Aruba, den representacion di SM Rey Willem-Alexander.
Su carera profesional na Island Finance
Ivy Simon a start su carera na Island Finance na aña 1981 como un “Credit Assistant”, a sigui crece despues como un “Associate Manager”, despues a bira “Branch Manager” y pa e ultimo 24 añanan e ta sinta den e funcion di “Country Manager” of tambe e “Managing Director”. Pa 8 aña largo el a maneha e oficina na St. Maarten tambe, cu un staff di 12. Island Finance na Aruba ta conta cu 4 sucursal, situa na Shaba, den John G. Emanstraat, Rockefellerstraat y den De La Sallestraat. Ta e intencion pa pronto habri un di 5 oficina. E compania ta conta cu 73 empleado.
Condecoracion Real como “Lid in de Orde van Oranje-Nassau”
Diahuebs dia 26 di April 2018, a tuma luga entrega di e condecoracionnan Real na Aruba, durante e tradicional “Lintjesregen”, caminda cu un total di 8 Arubiano a ricibi e distincion Real aki for di man di Su Excelencia Gobernador di Aruba, drs. Alfonso Boekhoudt, for di un total di 2908 ciudadano den henter Reino Hulandes, rond di e celebracion di “Dia di Rey”.
Su meritonan
Ya pa alrededor di 10 aña, Ivy Simon ta hopi activo den Quota International Club of Aruba riba tereno di trabao voluntario, prome como miembro y despues a carga e responsabilidad di e club di servicio como Presidente y awo funcionando como Vice Presidente. Ivy Simon ta conoci den comunidad como un di e miembronan activo di Quota, danki na tur e proyectonan cu el a bin ta realisa durante di su liderasgo.
Durante Carnaval e ta na cabes di e campaña anual di Earplugs pa asina promove e proteccion di oido contra molester di zonido pa tanto e carnavalistanan, musico, como publico, en particular pa e hubentud y muchanan chikito. Pa prevencion di molester di zonido, Quota tambe a bin cu aparatonan pa midi zonido, cual porcierto a cay den hopi bon tera.
Tambe Ivy Simon semper ta para como prome pa yuda den organisa e campaña di Back to School pa asina yuda muchanan di menos recurso, yega na nan articulonan di scol necesario. E ta percura tambe pa un cierto cantidad di e muchanan aki toch cuminsa e aña escolar nobo cu hopi entusiasmo.
Pero Ivy Simon no solamente ta pensa riba e muchanan, pero tambe na nos grandinan. Durante aña e ta organisa, hunto cu algun miembro di Quota actividad y bishita na varios cas di anciano. Cu e momentonan agradabel aki, e kier haci un contribucion chikito, pero significativo na nan bida.
Ivy Simon ta un miembro voluntario activo di Fundacion pa esnan cu Problema di Oido (FEPO), fundacion pa esnan cu problema di oido y tambe e ta miembro di directiva. E tarea aki, mescos cu e otronan, e ta haci sin ta pa beneficio propio.
Su carera spiritual
Fuera di actividadnan voluntario, Ivy Simon ta hopi activo spiritualmente. Desde su 17 aña e ta lesa “lectura” y tambe ta sirbi misa na Kapel Monte Calvario actual Kapel Juan Pablo II na Tanki Leendert. Door di esaki tambe e ta semper cla pa yuda den organisa koffiemorgen y otro actividadnan di recaudacion di fondo pa e kapel di e parokia.
Alabes, 35 aña pasa, defunto obispo Willem Ellis a hurament’e como “Acoliet” pa defunto Monseigneur Willem Ellis pa asina e tambe parti santo comuninion. Despues di esey riba un momento, Obispo Seco a hurament’e. Desde e tempo ey, e tey mas tempran tur diadomingo na Tanki Leendert y actualmente na misa Pro Cathedral San Francisco de Assis na Playa, unda cu e ta bezig cu e sirbidonan di misa y e partimento di santa comunion.
Tambe Ivy ta bay na e casnan den bario di Playa, unda cu e grandinan of esnan cu tin un ke otro limitacion, cu no por bin misa tuma santa comunion diadomingo, pa asina nan por logra haci e sacramento aki. Tambe e ta lesa semper e lectura y ta haci e tareanan regular necesario cu e sirbidonan di misa y otro eventonan religioso corespondiente pa Iglesia Catolico.
Pa e motibonan y pa mucho mas, sra. Ivy Simon ta un candidato valioso pa un distincion Real.
