E Coordinador Nacional contra Traficacion y Contrabanda di hende, hunto cu Polis, Departamento di Labor, Servicio di Impuesto (Afpakteam) y Kustwacht ta realisando un investigacion grandi relaciona cu traficacion y contrabanda di hende. Den e caso aki ta enfocando primordialmente riba un grupo procedente di India, cu ta den negoshi di restaurant, joyeria y paña.
Desde ayera caba autoridadnan ta haciendo e investigacion aki, den cual a bishita prome un cas, despues e restaurant Taj Mahal y asina a sigui awe pa varios otro negoshi y tienda mas.
Mirando e hecho cu a envolvi asina hopi departamento, cu tin e autoridad policial pa investiga y traha procesverbaal, ta obvio cu esaki ta un caso grandi. Ta sospecha cu ta trece trahadonan for di India y no ta paga nan e salario legal, no ta duna nan beneficionan, ta hinca hopi den nan den mesun cas y no ta inscribi nan na departamento di impuesto, SVB, Labor, AZV, etc. Di e forma aki ta limita e derechonan adkeri di e trahado pero na mes momento ta evadi Belasting.
No ta conoci si a detene cualkier persona den e caso aki. Mr. Jeannette Richardson-Baars, kende ta e Coordinador Nacional contra Traficacion y Contrabanda di hende a prefera di no duna comentario ainda y a referi na Ministerio Publico, kende ainda no a informa di e caso aki tampoco.
