Interkambio kultural ku embahadora di Repúblika di Ghana

Resientemente embahadora di Repúblika di Ghana, sra. Sophia Horner-Sam a hasi un bishita na nos isla pa asina sera konosí ku nos kultura i interkambiá di pensamentu tokante di raisnan históriko i herensia kultural di Ghana i Kòrsou.
Den kuadro di esaki sra. Sophia Horner-Sam a hasi un bishita di kortesia serka Minister di Enseñansa, Siensia, Kultura i Deporte (ESKD), sra. Marilyn Alcalá-Wallé.
Durante e bishita aki a toka diferente tópiko interesante riba tereno di kultura i enseñansa. A pone enfasis riba historia, herensia kultural i e similaridat entre e dos kulturanan.
Pa loke ta trata e parti di enseñansa a para ketu na nos idioma Papiamentu i kon esaki ta representá un meskla di diferente idioma ku ta bini for di un história riku.
Durante e interkambio sra. Sophia Horner-Sam a manifestá su interes pa krea i tambe fortifiká lasonan amistoso i diplomátiko entre Ghana ku Kòrsou. A interkambiá tokante ideanan enkuanto rikesa históriko i kultural ku e meta pa por kompartí e siñansanan baliosonan aki den nos skolnan.
Minister Alcalá-Wallé a apresiá e interes ku sra. Sophia Horner-Sam a mustra pa Kòrsou i ta sigui hasi su máksimo esfuerso pa engrandesé nos kultura ku ta bini di e.o. origen Afrikano, i alabes ta keda sostene e pensamentu ku un komunidat eduká, formá, ku étika (norma i balornan haltu) i empatía pa otro, ta forma un komunidat ku ta bria awor i den futuro.