E tema di crisisheffing di 2.5% ta topico di combersacion desde cu esaki a wordo anuncia. E trahador luchado ta calcula y calcula con ta hasi pa carga e peso aki otro luna nos dilanti.
SEPPA ta preocupa cu e hecho cu pronto ta bin cu un crisisheffing di 2.5%.
Awor nos ta scucha e gritonan cu a subi e presupuesto cu un suma grandisimo. Mientras di otro banda ta busca na saca un suma igualmente grandi serca nos comunidad cu e famoso crisisheffing.
Awor, por hasi politica cu e asunto aki, por papia di 8, 10, 12 of 16 aña largo mes di a bisa algo of a opta pa keda keto. Esaki tur hende a bin ta tende como reaccion, asina cu bisa algo. Simplemente falta argumento pa ora bo no ta hasi mihor.
Comparacion di tempo di BBO y awor crisisheffing: No tin nada di dialogo !!
Nos a crea un isla di turista, mientras e trahador mes apenas ta sobrebibi, ya no ta comfortabel riba su mesun lugar y awor mirando con e cosnan aki ta canando, Gobierno ta frustra tur expectativanan di trahador cu ta confia den democracia pa eleccion di gobernantenan cu unabez sinta den e stoel no ta bandona e pensamento cu trahador tur biaha tin cu carga e consecuencianan pa falta di desicionnan of di desicionnan robez.
E gran berdad riba tur loke tin awendia ta cu tempo a introduci e BBO, tabatin un ciclo di informacion, di splicacion, a pasa diferente instancia e.o. sindicatonan pa splica kiko ta e motibo, kiko ta e intencion i/o destinacion cu e placa, cuanto tempo e comunidad tin cu carga e peso aki, etc..
No tabata facil, a tuma di tempo di tur esnan envolvi, pero esaki a juda tur hende pa compronde e tema.
Pero e biaha aki nada di esaki a sosode, tur posibel introduccion di e 2.5% sin ningun consulta cu ningun gremio menos gremio sindical.
Pues, esaki a sosode al estilo di tira un balon den laira y warda ken ta kibra e balonnan pa despues anuncia medida. Un maneho cu no ta cuadra cu un maneho drechi di un gobierno den un estado democratico. Un maneho cu no ta tene cuenta cu sindicalismo y partnernan social, ya cu sin duda e medidanan tin repercusion pa e pueblo trahador completo.
Ta parce cu gobernantenan ta spera cu pueblo ta simplemente sigi nan tras den medionan di prensa, uno cu e verdad y otro cu menos verdad den su version, uno cu e noticia bruha of falso, pero ta tras di kende su palabranan nos mester bai di e forma aki.?
Esaki no ta forma pa atende cu e clase trahador !!
SEPPA ta adverti cu e asunto aki por trece consecuencianan serio pa tur hende, specialmente e clase trahador su cartera.
Gobierno mester por contesta trahador riba kiko esaki por nifica pe !!
Nos por specula e efecto di e crisisheffing aki, algun ta hasta menciona te na 10% mes cu esaki lo afecta e cartera. E berdad ta cu e 2.5% extra mes ta hopi caba.
Pesey mes ta bon pa gobierno papia palabra cla, esta si ta berdad cu e crisisheffing ta un sistema cumulativo es decir cu cada coneccion di belasting ta wordo confronta cu e crisisheffing si of no manera ta wordo papia.
Pero tambe kiko gobierno ta hasiendo pa percura cu e trahador no ta perde su poder di compra door di e introducción di e crisisheffing aki sea ta bin un compensación door di baha e tarifa di inkomsten- y loonbelasting si of no ¡!!
Gobierno mester comprende cu e tema tin basta preocupación caba cerca e trahador y cu hopi hende no ta di acuerdo cu e introducion di e belasting aki.
Ta pesey mes S.E.P.P.A. ta pidi pa yega na entendimiento con pa compensa e trahador na un forma husto.
Gobierno como dunador di trabao mester compronde cu Inflacion subi ta Jamada pa negosacion pa empleadonan publico!!
E ultimo añanan, sigur desde 2015 te cu awo, cifranan di CBS a indica cu tin un deflacion aki na Aruba. Ta nifica cu aunke e empleado publico a sinti efecto di prijsnan cu tabata subi y suta su cartera, e cifra di CBS no a habri espacio pa negosha ahustacion debi na costo di bida. Pues no tabatin indexering !! Tur hende por tabata keha, kizas cu razon, pero abase di kiko si cifranan tabata papia otro.
Pero loke ta premira aworakinan ta cu pronto lo tin e exigencia aki nos dilanti y ta bon pa gobierno como dunador di trabao tene cuenta cu esaki.
SEPPA ta pidi Gobierno pa encamina e proceso di Dialogo !!
Nos ta kere firmemente cu pa e clase trahador y e pais aki bai padilanti cu esaki ta implica cu nos tur hunto ta canda den un proceso igualitario pero cu uno cu ta real.
E forma cu Aruba ta bayendo nos ta spanta nos hendenan, principalmente nos hobennan cu loke ta pasando akinan y cu si nos pais sigi den e direccion aki, unda ta parce cu no tin solucion ni proposicionnan, e trahado hoben lo tin solamente dos opcion, of trata na yega na trabao di un manera precario of prepara maleta y bandona nos pais.
