Diabierna cu a pasa Joshua John a yega Aruba for di Hulanda. John ta aki pa duna un clinica diahuebs awor pa hobennan di Aruba. E futbolista di origen Arubiano ta un hoben masha modesto. El a splica cu e aña aki tabata uno bon p’e. E ta cuminsa hunga bek pa FC Twente, den division di honor. FC Twente ta un club grandi awor na Hulanda, un club pa tene cuenta cu n'e. David Abdul, kende a yega di hunga hunto cu Joshua John den Club Sparta, ta organisa e clinicanan na Aruba.

Un total di tres hende ta saldo di e heridonan na altura di veld di Winston. Un pickup a sali subi caminda sin duna preferencia. Net un Daewoo tabata biniendo y asina nan a dal masha duro mes. E velocidad tabata basta halto mirando e danjo material pero e falta di preferencia tambe a hunga un rol.

Durante e di tres Conferencia Pan Americano tocante Obesidad, Minister di Salubridad Publico y Deporte dr. Richard Visser a otorga un reconocimento na e hotel anfitrion di PACO III, Westin Aruba Resort pa su esfuersonan den e area di promocion di Healthy Living. Westin, for di e compania madre ta promoviendo opcionnan mas saludabel pa loke ta trata nutricion, pero tambe mas actividadnan beneficioso pa nan clientenan.

E organisacion "We Love Students" hunto cu ayudo di diferente instancia y sponsor a organisa pa prome biaha un caminta combina cu obstaculonan/opdracht durante e ruta. Mas cu 40 team a participa pa despues pasa un rato ameno cu musica di diferente dj y banda musical.

E trafico di Playa pa San Nicolas no tabata asina facil pa automobilistanan bayendo direccion pariba. E Green Walk di AVP a ranca basta hende cu sea a bai cana of core bicicleta. Canto di caminda tabata tin sea autonan para of hendenan den cura pa asina mira e cantidad di autonan of tambe candidatonan di AVP bayendo San Nicolas.

Siman pasa, Joy Kok y Edjean Semeleer a yega na un acuerdo concreto, pa asina rebiba e proyectonan cu un tempo a sirbi como plataforma sumamente importante pa nos artistanan local por a expone nan talento y nan arte. Ambos tin varios aña expresando na otro nan deseo di hinca bida bek den e eventonan aki cu un tempo tabata e eventonan mas importante y prestigioso pa tur nos artistanan local.

Diadomingo dia 9 di Juni, Museo Arqueologico a transforma den un “experimental playground” na  unda mucha y adulto a haya un “taste” di e programa vacacional cu Museo ta ofrece e aňa aki. Den e tema di “Horcan”, un subtema di e exposicion temporario ‘Boc ‘I Brik’ como tambe di e vakantieprograma 2013, bishitantenan a haya un lectura hopi informative di sr. Bibi Arends, a pasa door di un “Hurricane simulator” y a haci diferente experimento di (mal)  tempo.

Minister Plasterk ta na Aruba. E prome encuentro cu Gabinete Eman tabata uno sumamente positivo. Den oranan di diadomingo mainta gobierno di Aruba y Hulanda a firma dos protocol cu ta regarda inversionnan di FDA. Inversionnan cuantioso ta wordo haci den varios proyecto cu ta sigura implementacion di programanan sostenibel na Aruba durante e periodo 2013-2015 y despues.

Blanca Maria del Socorro Alcala Ruiz ta senadora electa na estado di Puebla na Mexico. E ta diputado local na Mexico. E ta na Aruba tambe durante e Third Pan American Conference. El a hiba palabra durante e evento representando Parlatino.

Na varios ocasion, tanto verbalmente como por escrito, mi a splica cu e maneho riba admision cu mi a hiba tempo cu mi tabata minister – mi ta keda para riba esaki -tabata tough but fair, y semper humano. E asina yama “Swiss Model” ta nada otro cu un manera pa PROTEHA cualkier trahador local.

Diasabra anochi Minister Michelle Hooyboer-Winklaar a atende e anochi di graduacion di studiantenan di International School of Aruba. E evento a tuma luga na Hyatt Regency y a conta cu un sala yen di studiante, cu awor ta cla pa sigui nan estudio na Merca entre otro.

Fundashon Mi Por ta yuda muchanan y hobennan te cu edad di 21 anja, kendenan a nace cu un desabilidad fisico of a obtene nan desabilidad fisico na un edad mas avansa. Pa nos por sigui cumpli cu nos meta y asisti mas mucha posibel pa nan por yega na nos ‘zwem therapie’ ta necesario pa nos por yega na un transporte special pa rolstoel. E iniciativa pa yega na nos bus ta conta cu e aporte di dos componente hopi importante.

Diabierna atardi Aruba Airlines a launch nan destinacionnan di Aruba pa Maracaibo Aruba, y Aruba pa Panama Aruba cu ta cuminsa bula dia 28 Juni. Aruba Airlines ta un aerolinea nobo di Aruba cu a cuminsa opera dia 31 Mei di e aña aki oficialmente. E vuelo inicial nan lo ta for di Panama pa Aruba y Maracaibo y proximamente cu conexion desde Aruba pa Miami y Sao Paulo, Brasil.