IBiSA, COA y Aruba Bank ta celebra Olympic Day dia 23 di juni 2018

Cu participacion di cada mucha representando su school den e careda di 1, 2 y 3 kilometer diasabra awor 23 di juni na Parkeerplaats di Aruba Bank Camacuri y un ‘5K Fun Walk & Run’ cu ta habri pa participacion gratis di publico, IBiSA, Comite Olimpico Arubano y Aruba Bank ta celebra den grandi “Olympic Day 2018”.
E reaccion principalmente pa e competencia entre nos muchanan den e careda di 1, 2 y 3 kilometer, cual ta un competencia escolar riba calendar di deporte di IBiSA pa schoolnan, ta sumamente grandi. Tin algun luga ainda y por registra te dia 22 di juni via www.deporteescolararuba.com IBiSA ta haci un apelacion y recordatorio na tur mayor pa e muchanan tey presente pa 6.00 a.m. na Aruba Bank Camacuri pa busca nan Bib number, E careda mes ta start pa 7:00 a.m. E muchanan tin cu acudi na e mesa di registracion riba cual ta indica e catagoria den cual e ta bay core.
Prome cu e careda, tur mucha ta ricibi tambe un T-Shirt di ‘Olympic Day’. Lo ta preferi pa e muchanan lo bisto e tshirt durante e actividad.E area ta solamente pa participante, pa cual ta pidi mayor y docentenan pa ubica nan mes riba e ruta di e careda pa apoya e muchanan.
Debi na e cantidad di riba 300 participante, e caredanan ta bay tuma lugar den e sistema di ‘heat’ (den grupo), y e miho tempo overall di e prome 3 lugar den cada categoria di edad pa tanto mucha muher como mucha homber ta esnan cu ta wordo premia cu medaya.
Prome cu e competencia di nos muchanan, ta tuma lugar e ‘5K Olympic Day Fun Walk & Run”. Participacion na esaki ta gratis y e prome 200 registrante ta ricibi tambe un T-Shirt di ‘ Olympic Day’. No tin premiacion pa esnan cu ta participa na e 5K, pero si pa e careda di 1, 2 y 3 kilometer di nos muchanan. E parti di premiacion aki ta tuma lugar na momento cu tur dato keda procesa despues di e careda y na final di 1,2,3K
Despues di 1,2,3K tin mas actividad riba programa manera “Meet the Top Athletes” , demonstracion di diferente deporte y un kids corner un mainta yen di actividad.
Tur mayor ta invita pa bin apoya e muchanan den nan competencia y despues pa participa activamente den e 5K. IBiSA, COA y Aruba Bank ta conta riba un asistencia grandi pa celebra “ Olympic Day 2018