Husticia ta investigando specificamente tambe e fundacion di campaña di e Minister, esta Stichting Leadership and Excellence situa na Palm Beach # 51 lokaal 7 na Noord. Desde 18 di december 2014, Giovanni Capriles ta encabesa e fundacion.
Manera ta conoci, dia 28 di maart ultimo, Husticia a bishita un total di 13 diferente adres, incluyendo Bestuurskantoor, relaciona cu un investigacion cu a haya e nomber di Ibis. A detene algun hende den e caso aki, den cual Ministerio Publico ta acusa e mandatario personalmente di a tuma regalonan, promesanan y/of servicionan relaciona cu “ontheffing” di e “arbeidsmarkttoets” dor di cual stranheronan a haya oportunidad pa haya permiso di trabou.
Concretamente e acusacion contra Minister Paul Croes ta: “Ambtsmisbruik” y duna permisonan cu no tabata mag di traha na Aruba a base di nan “verblijfstitel”, oportunidad pa toch traha na Aruba. Tambe ta acus’e di labamento di placa di sobornonan ricibi. E sospecho di “ambtelijke corruptie” ta consisti di pidi/tuma soborno a cambio di “ontheffing van het arbeidsmarkttoets”. Despues di e “huiszoeking” na su cas, a acus’e tambe di “mensensmokkel” argumentando cu e tabatin un empleada illegal trahando den su cas.
E investigacion ta continua.
