Hulanda NO ta reconoce resultado di eleccion na Venezuela

Awe diamars a tuma luga un reunion den Parlamento (Tweede Kamer) Hulandes den cual Minister di Relacionnan Exterior, Stef Blok, a laga sa cu Hulanda no ta reconoce e resultado di e eleccion teni diadomingo ultimo na Venezuela den cual a reeligi Nicolas Maduro como Presidente. E motibo ta cu e eleccion no tabata liber, ni independiente. Hulanda ta consciente cu Venezuela ta e pais di Zuid America mas cerca di Reino Hulandes, siendo bisiña di e islanan ABC.

“E pais ta un bon ehempel di con Bo por yuda daña henter un economia di un pais”, segun Minister Blok. Reino Hulandes ta bon consciente cu tin hopi Venezolano ta scapa di nan pais pa Colombia, pero tambe pa Aruba, Boneiro y Corsou. Den Parlamento Hulandes tin hopi preocupacion pa e desaroyo aki.

Mester menciona cu den Union Europeo tampoco e sentimento relaciona cu e proceso di eleccion ni e resultado di eleccion na Venezuela no ta positivo. Nan ta convenci cu nan no ta cumpli cu standardnan internacional. Ta considera e atendencia pober na e eleccion como un muestra di e falta di validez di e resultado. Ta sinti falta di respet pa pluralismo politico, democracia, transparencia den estado di derecho. Federica Mogheri, encarga cu asuntonan exterior di Union Europeo a pidi pa Maduro laga presonan politico den libertad y pa restablece democracia bek den e pais.

Ta spera cu Union Europeo lo aumenta e sancionnan contra Venezuela.

Pa loke ta Aruba, lo bira interesante awor cu Union Europeo ta bay lanta e sancionnan contra Venezuela, si Hulanda lo permiti pa e islanan ABC habri frontera bek pa carga.