Hulanda a pone avion disponibel pa bula entre islanan BES y St. Maarten

Gobierno Hulandes a pone un conexion aereo nobo entre Boneiro, Saba, Sint Eustatius y Sint Maarten. Ta pa e motibo ey e trafico aereo entre e islanan, cu tabata mal regla debi na e horcannan Irma y Maria, awor ta haya un impulso nobo. Entrante 26 di Februari, pa tres luna, CN Express lo bula entre e islanan cu un ATR 42 di 48 pasahero di Air Antilles. Lo bula tur dialuna y diabierna entre Boneiro, Sint Eustatius y Sint Maarten. Pa vuelonan pa Saba lo haci uzo di un DHC-6 Twin Otter di Winair.

E conexion aki ta un iniciativa di e Ministerionan di Asuntonan Interior y Relacionnan di Reino y e Ministerio di Infrastructura y Waterstaat.

Despues di tres luna lo evalua si CN Express a logra su meta y si mester mantene e servicio aereo.