“Gobierno tin tur derecho pa nombra un Alto Comisario, esey no ta e problema. E forma con nan ta haciendo e ta bay hinca nan y e hefe nobo den problema, specialmente cu e top actual di Mando Policial”, asina un fuente cu conoce e herarkia policial den su plant’i man a splica awe. E forma “slordig” cu a core nombra un Inspector den e funcion mas halto den Polis ta bay pone cu na final, lo tin victimanan, sea e persona aki mes of e actual Comisarionan cu sin duda tambe lo ta interesa pa e puesto maximo.
Cuerpo Policial Aruba te cu siman pasa, tabata consisti di tres Comisario y un Alto Comisario, cu hunto cu e hefe di e cuerpo civil, ta forma e Korps Management Team (KMT). Na cabes tabatin Alto Comisario mr. Adolfo “Dolfi” Richardson, cu desde Augustus 2010 tabata na cabes di e organisacion policial. El a tuma over for di Peter de Witte. Ta bon pa bisa cu Richardson ta un Hurista, ta un Criminologo studia na VU Amsterdam y a studia “Police Management” na Nederlandse Politie Academie na Appeldoorn. Awor e ta cla pa un reto nobo, den cual e lo dirigi e oficina di Interpol di Aruba y alabes lo lanta un departamento nobo anti-terorismo.
Como Comisario di Polis tin awor Vanessa Tjon-Kock, encarga cu e departamentonan special den Polis, manera Centrale Post, Mobiele Eenheid, Arrestatie Team, Duik Team, VIP Team, etc. Na mas di un ocacion y te luna pasa ainda, e tabata fungi como Alto Comisario interino den ausencia di Alto Comisario Richardson. E tin 6 aña den e funcion di Comisario di Polis.
Como Comisario di Polis encarga cu “Recherche Diensten” tin awor Trudy Hassell, cu tambe tin un experencia masha amplio den e funcion aki. E tambe a yega di sinta den e funcion di Alto Comisario interino den ausencia di e actual Alto Comisario. Su rol ta pa dirigi tur e departamentonan cu ta resorta bou di “Justitiele Politie”, pues tur cu ta traha masha estrecho cu Ministerio Publico. E tin mas cu 10 aña den e funcion.
Como Comisario di Polis encarga cu “Algemene Dienst” ta Irma Gordon. Su rol ta pa dirigi e Polisnan uniforma den tur e districtonan y tambe algun departamento adicional. Esaki ta e grupo mas grandi y ta e prome nan yama na momento di cualkier asistencia. E tin 6 aña den e funcion.
Cu e situacion asina aki, por mira claramente cu no ta existi un di 4 Comisario, ni tampoco tin tareanan asigna pa un otro comisario cu no ta e tresnan existente. Bisando esey, Gobierno lo a evita masha dolor di cabes si a nombra Andrew Hoo den e funcion di Alto Comisario, pasobra esey ta prerogativo di Conseho di Minister. Pero, na su luga a opta pa nombr’e como Alto Comisario Interino. E funcion ey no ta existi!
Pues awor tur hende ta pendiente ki funcion a dune, pasobra el a sali for di Polis mas o menos 1 aña pasa como Inspector Primera Clase. Pues como Inspector ta dificil pa ta Wnd. Korpschef pasobra e lo pasa riba tur cu ta riba dje den rango. Awor cu nan bira nombre Comisario, e funcion ey no tin vacatura pe y lo por bira problema cu esunnan existente y cu por desemboca den batayanan legal.
Minister di Husticia mr. Andin Bikker ainda no a sinta cu e Management Team di Cuerpo Policial Aruba pa splica di su intencionnan y con e tin pensa di aloca Andrew Hoo den e organisacion policial. Specialmente si ta bisando cu e lo ta e Alto Comisario Interino y cu lo bin un solicitud habri pa e funcion. Kico lo pasa si sea Tjon, Hassell of Gordon tambe aplica y nan resulta e miho candidato? Den ki funcion Hoo lo keda atras e ora?
Como cu no tin claridad ainda riba e forma cu e Minister a pensa di nombra un Alto Comisario nobo, ta reinando hopi falta di comunicacion y di preguntanan sin haya contesta den top di Polis. Mañan cu ta bay huramenta Andrew Hoo, ta spera cu varios di e preguntanan lo haya contesta, pa e ora tur cu ta riba e funcion di Inspector Primera Clase por sa con nan ta para y si a salta funcion den e herarkia Policial den e caso specifico aki.
