Diamars, pa mas of menos 3’or y mey di atardi, Central ta manda patruya na Ibero American High School situa den Dr. Schaepmanstraat pa un caso di maltrato. Eynan a papia cu e homber C., kende a declara cu el a bay haci compras den Macro Supermarket.
Durante su compras, el a wordo acerca pa un homber desconoci. E homber desconoci a puntr’e kico ta e problema cu e cifranan di examen di e alumno A. C. a declara na e homber desconoci cu e no sa ken e persona ta y cu e no ta ni bin scol. Despues di esey C. a haya un mokete na su cara for di e homber desconoci. Tambe C. a declara cu ora el a cana bin p’afo, el a wordo menasa pa e homber desconoci. Un hoben yama FC a declara cu e tambe tabata den Macro e momento ey, net el a mira e homber desconoci kier a ataca C. FC a hala nan for di otro. Yegando pafo, e homber desconoci a saca un martiu for di den su auto y kier a dal C. cun’e. FC a purba kita e martiu di e homber desconoci, pero e no a logra. E ora e homber desconoci a expresa na FC y C cu e por mata tur dos.
Cy FC a declara cu despues di e sucedido, e homber desconoci a core bay den un Toyota Yaris color shinishi. Tambe FC ta asumi cu e homber desconoci lo ta amigo di e mucha muhe A. E dama yama L. a declara cu e tabata den e negoshi y a scucha grito y a mira esnan envolvi pafo ta cana. El a tende cu e homber desconoci ta expresa cu e tin boca grandi y no por haci nada. E homber desconoci a coy un martiu y a expresa cu e por mata nan, no pensa cu no por mata nan. Patruya a conseha ambos persona envolvi pa bay duna keho na recherche. Despues polis a bay na Macro supermarket pa asina tira un bista riba imagennan di video. E doño di e negoshi despues lo controla e imagennan.
