Hoben local firma door di Tampa Bay Rays

Un otro sonjo di un hoben pelotero di Aruba ta bira realidad ora cu e ekipo di Tampa Bay Rays ta extende un firma profesional na catcher Nigel Calmes.

Un firma cu un organisacion professional di baseball ta locual tawata Nigel su deseo pa mas di 3 anja caba. E trayectoria tawata largo y na ultimo ya a cuminsa pensa cu Nigel no lo jega na locual e ta anhela, pero e mes no a perde speransa nunca y cu e sosten di su tata Rudolph Calmes nan a keda insisti pa logra su meta.

 Nigel Calmes a cuminsa hunga baseball cu e ekipo di Aruba Giants Baseball Organization ora cu su primo Shaquille Calmes un atardi a invite pa bai training ariba e veld di Sero Preto. Y asina Nigel a cuminsa den e deporte cu awor ta bira su bida, baseball. E ekipo di Little League di Benjamin Security Services bou maneho di Sr. Benjamin Francees e temporada ey a cosecha hopi exito door di titula campeon na varios occasion y cu Nigel como catcher.

 Nigel Calmes tawata catcher estelar den e Serie del Caribe di Little League pa e seleccion di Aruba unda e ta gana premio tambe como mihor catcher di e torneo. Nigel a sigui hunga na Aruba den varios liga pero cu su 15 anja e ta tuma e desicion di bai biba na hermana isla Curacao hunto cu e ekipo di Sr. Lando Chirino Trai Seru. Un desicion cu un meta cla, Nigel su sonjo di bira un profesional lo cuminsa na Curacao, aki ta unda e la muda pa bai biba serca su wela Sra. Irene Nassy.

 Nigel ta sigui sobresali como catcher y forma parti di seleccion di Liga Pariba di Curacao. Den preparacion pa hanja un firma Nigel a hanja e chens pa bai experencia un academia di baseball na Santo Domingo pero apesar cu tawatin varios ekipo interesa Nigel no a logra hanja e contract cu e tawata desea.

 Pa cualkier hoben pelotero e fecha di 2 July cu 16 anja ta e fecha cu lo kier logra firma un contract profesional, na momento cu e lunanan y hasta e anjanan pasa e chens pa hanja un contract ta bira super chiquito, Nigel tawata sa esey pero manera e mes ta bisa e nunca no a give up, e sosten di su tata tampoco no a lage give up.

 Na November ultimo e Showcase Venezuela a bin Aruba pa tene su tryout pa e mihor prospectonan di Venezuela na Aruba. E situacion sociopolitico na Venezuela ta pone cu e 30 organisacion di baseball profesional ta prefera di bin Aruba pa asina scout e mihor hungadornan di Venezuela na Aruba. Cu e hecho aki den pensamento e tata di Nigel, Sr. Rudolph Calmes a logra pa Nigel a hanja un oportunidad di tryout dia 1 December ultimo. Nigel a impressiona e organisacion di Tampa Bay Rays cu a pidi un “private tryout” e siguiente dia pa 8:30 di mainta y aki ta unda no a keda niun duda mas, Nigel lo forma parti di e organisacion di Tampa Bay Rays.

 Diaranzon 27 di December dilanti famia y conocirnan na e oficina di Notaris Hilde Rodriquez-Taekema, scout di Tampa Bay Rays Sr. Chairon Isenia a bin di Curacao pa asina oficialisa e momento unico.

Nigel mes kier a gradici na prome lugar Dios, na di dos lugar su tata Rudolph Calmes cu semper pero semper tawata tey pele y cu cada cos cu e tawatin mester, na su wela pa a yudele tempo e tawata na Curacao, na su rumanan Jayseline Calmes, Jason Willems y Rudson Calmes y su mama Mirelda Vos y henter famia cu semper a kere den su persona.

 Nigel ta un ehempel bibo di ora bo ta kere den bo mes y bo talento, nunca give up y persevera lo bo logra. Nos di Sports Zone Aruba y Baseball Aruba ta desea Nigel Calmes tur clase di exito, awor e trabou duro ta cuminsa y e caminda por ta largo pero unda tin un deseo pa logra semper Dios ta crea un caminda pa jega. Masha Pabien!