E criatura di 8 aña cu ta envolvi den e accidente serio na Malmok ta wordo manda Colombia. Su situacion ta critico y na Colombia tin miho yudansa pa scapa su bida.
Dor di e impacto el a haya sla di cabes, fracturanan serio y hasta perde su pia drechi. Dokternan tabata teme pa su bida. Ta un menor turista cu a pasa Aruba riba barco crusero hunto cu su famia. Aki el a accidenta durante un tour. E mes tabata sinta na banda. Varios hende a yuda ora e accidente a sosode. E menor tabata for di tino y a keda asina tambe hayando e tratamento. Dokternan a evalua su situacion y a opta pa mande Colombia cu urgencia pa asina por haya yudansa mas specialisa pa e complicacionnan ricibi. Hendenan na Aruba tin e criatura den nan oracion.
A keda confirma cu e mucha a perde e pia drechi. No por a haci nada pa scapa e pia. Dokternan a oper’e mesora y amputa na rudia. Ainda no sa exactamente con e accidente a sosode. Loke si por bisa ta cu e vehiculo ta nobo y ta di un compania di tour. Pesey no por papia di un aparato defecto. Tur cos ta indica cu ta un eror humano di un di e chauffeurnan turista sea di e van of di e UTV mes.
A base di declaracion di testigonan tambe Polis por haya un idea di e accidente. Tabatin mas hende riba tour e momento ey tras di e UTV accidenta riba e caminda di Malmok. Forsa na tur cu ta envolvi cu a keda trauma cu e accidente. E no ta algo facil pa pasa aden principalmente si tin menor envolvi.
