Awor aki e tarifa pa staciona auto cu aruParking ta cobra ta 2 florin pa ora. Na Corsou ta un florin. A haci diferente pregunta na Teo Croes director di Arubus cu ta responsabel tambe pa AruParking.
Riba e pregunta si AruParking lo sobrevivi si baha e tarifa mescos cu Corsou, Croes a splica cu e problema di Corsou ta, cu nan kier subi’e, pero gobierno no a duna autorisacion ainda pa haci esaki. E tin cu wordo cambia den ley pa por subi tarifa. No por yega na dje. Nan no tin e ganashi manera nan ta spera di haya. E no ta yegando manera mester ta. Na Aruba, kier bin cu diferente tarifa, manera bin cu e propuesta pa baha e prijs, pa asina duna facilidad pa por paga 1 florin pa ora. Ora cu e cliente bay mas cu un ora e ora e tarifa ta bira 2 florin.
Tarifa pa turista
A sinta hunto cu gobierno anterior riba esey. E prome tabata pa cuminsa cu e carrentalnan cu lo bin cu cierto condicion cu lo mester cobra un suma. Esey gobierno su idea tabata pa cobra un suma chikito. Tur Vwagen lo pag’e pa dia. Ora nan huur auto, nan mester entrega tanto. E ora e vwagen por para unda cu nan kier, cu exepcion den geel. Toch lo wak pa no sanciona nan den geel si no ta necesario y nan por paga cualkier caminda sin cu mester paga. E ora no lo tin e problema ey mas.
Meta final
Tur cos ta depende di decision di e maneho cu gobierno kier hiba riba locual ta parkeo, hunto cu hunta di comisario. Croes ta kere cu e ta bay ta den bon caminda. Gobierno ta bezig cu un rapport y un plan. E lo ta bon caminda, unda cu por genera e placa bek, pero tambe por duna accesibilidad na caya.
Unda Aruparking ta awo
Tempo cu Aruparking a cuminsa nan tabata tin 30 mil pa siman. Awo nan ta para riba 7 mil florin pa siman. Y nan no por haci nada si hende no kier paga ora di para den vak blanco. Aunke tin hende ta pagando ainda y tambe turista. Mayoria turista cu ta paga ta Mericano, Europeo y nan ta custuma di paga pa parking. Nan ta hay’e barata. Hasta e boet nan ta haya barata.
Pendiente pa decision
Awor aki gobierno ta bezig cu un plan, cu nan lo bay comunica cu Aruparking den corto tempo cu lo sinta pa mira kico e maneho y plan lo bay bira pa por ehecuta esaki.
Vaknan geel
E vaknan geel ta wordo gehuur pa luna pa diferente hende cu ta traha den Playa den cierto area. Croes a splica cu nan a perde mas of menos 35%. Esey ta e grupo cu ta para den vak blanco. Tin cu a mira cu ta pagando riba e geel pa no perde y ta para den vak blanco mas cerca. Ta mira e stickernan.
E tarifa di e vaknan geel ta rasonabel, mirando cu nan a bah’e, di acuerdo e salario.
