Awe merdia, pa mas of menos 3’or, habitantenan di Groningen a spanta debi na e temblor di mas pisa den e provincia desde 2012. Ta bay riba un temblor pisa di 3.4 riba e escala di Richter, segun KNMI. E epicentro tabata situa den e pueblo di Zeerijp den e gemeente Loppersum.
Segun e website di noticia, Algemene Dagblad, varios hende spanta a tweet riba stoelnan cu a tembla, vloernan cu a kraak. Pero e temblor aki no a causa ningun calamidad of herido, segun polis y brandweer. Tampoco no a drenta ningun melding riba colapso, aplastamento of colision (boksmento). “Nos tambe ta bezig ta wak kico por tabata e consecuencianan,” segun vocero di polis.
E telefon na e Centro Veilig Wonen (CVW), cu ta encarga cu asuntonan di daño despues di un temblor, ta completamente ocupa. Hopi melding a drenta despues di e temblor, pero un vocero no por bisa mucho riba e daño preciso. “Si nos a ripara cu hopi hende a spanta.” CVW lo keda habri te cu 8’or di anochi. Habitantenan por yega tambe na e gemeentehuis di Loppersum pa asina meld nan daño. “Despues di 8’or di anochi nos por haci un calculacion di e cantidad di meldingnan,” segun e vocero.
Di seis den un luna
E temblor di awe merdia ta e di seis cu Zeerijp como epicentro den un tiki mas cu un luna di tempo. Riba dia 22 di December, a tuma luga dos temblor leve den e pueblo cu un forsa di 0.4 y 1.7, segun KNMI. E teblor di mas pisa na Groningen a tuma luga dia 16 di Augustus 2012 na Huizinge. Esaki tabata tin un forsa di 3.6. Na 2006 a midi un temblor di 3.5 den e area.
E temblor di mas pisa cu a yega di wordo midi na Hulanda tabata na 1992 na Roermond y tabata tin un forsa di 5.8. Temblornan hopi biaha por wordo sinti desde 2.5 riba e escala di Richter.
Habitantenan rabia
Varios temblor na Groningen ta consecuencia di exploracion di gas den e area. Nederlandse Aardolie Maatschappij (NAM) a haya na 1963 un concesion pa por saca gas for di tera. Te cu 2015 un total di 2115 miljard Nm3 (e midi pa gas subteraneo) a wordo saca for di Groningenveld. E gas ta situa mas of menos tres kilometer bao di suela. Mayoria di e temblornan tambe ta tuma luga riba e profundidad aki.
Rond di e area di exploracion di gas na Noordoost di Groningen, ta biba mas of menos un 150 mil persona. Habitantenan, di cual casnan den algun caso, ta wordo basta bon afecta door di e temblornan, ta protesta durante e ultimo añanan varios biaha contra di exploracion di gas. Esaki a wordo disminui den mas cu un ocasion. Awo, 21,6 miljard cubico pa aña ta wordo saca for di tera.
