Na un prome instante Gobierno a reacciona bisando cu e noticia no ta berdad. Despues a bisa cu ayera WEB a manda un email pa Utilities Aruba NV y ya e ta den prensa awe. Hecho ta cu WEB a bati alarma simannan pasa caba pidiendo aumento di tarifanan desde luna di juli. WEB mes awe lo a menciona cu e porcentahe menciona no ta cuadra, aunke cu nos a skirbi cu e ta entre 10 y 20% segun nos fuente den WEB. E aumento ta mara na dos componente, e aumento di crudo internacional y e cambio di e “fuel oil” debi na molester pa trahadonan riba waf di carga.
Mester menciona cu aumento di crudo na nivel internacional ta bisto. Presidente di Utilities Aruba NV, Richard Eman, a menciona den un entrevista cu e tarifa internacional a subi cu 30% desde november ultimo pa awo. Bisando esey, e prijs pa WEB produci awa y coriente como tal ta mas.
Sinembargo, Utilities Aruba NV ta kere cu WEB tin hopi espacio ainda pa corta den nan propio gastonan prome cu bati na porta di Gobierno pa aumenta tarifa. E instruccion ey a bay bek na WEB tambe.
“Nos no sa di ningun carta”, asina Prome Minister Evelyn Wever-Croes a sigura awe mainta. El a bisa cu e carta a bay pa Utilities Aruba NV y como cu e ultimo aki mes a informa WEB pa baha gasto, nan no a ni trate, te pa mande pa Gobierno.
