Falta 52 dia pa gabinete Wever Croes entrega concepto di presupuesto 2019 na Parlamento cual presupuesto mester presenta un reduccion di 12 miyon florin pa loke ta gasto di personal a base di palabracion cu a wordo haci entre gobierno y CAFT y gobierno di Reino.
Fraccion di AVP a tuma nota cu Prome Minister a declara cu Conseho di Minister di Reino Hulandes lo no a atende e punto di KB mas cu tabata riba agenda pa e ultimo reunion, loke tabata un satisfaccion pa su gobierno.
Sinembargo esaki a wordo logra a base di promesanan cu a haci cu tanto e comision di supervision financiero, CAFT y cu gobierno Hulandes caminda a priminti cu lo bay baha e gastonan di personal di gobierno, cu e suma di 12 miyon florin cuminsando caba na aña 2018.
Mientras cu Prome Minister a insisti durante reunion di parlamento cu su gobierno lo no bay retira ningun trahado for di servicio, e tempo cu a resta pa logra esaki ta mustra cu sin duda esey lo bay ta e caso ya cu no tin otro formula real y existente, pa logra e reduccion aki manera cu a wordo priminti.
E plan di personal ta consisti di e.o. limita fluho di personal den aparato gubernamental excepto orden publico y enseñansa, limita extension di esunnan cu ta ehecutando proyectonan, como tambe limita aumento di periodiek pa ambtenaar. Tambe Gobierno lo limita overtime y stimula di manera boluntario salida di personal, como tambe limita vacaturanan cu ta wordo crea door di pensioen. E shete puntonan cu Prome Minister a presenta den Parlamento, lo no logra reduci e suma cu a wordo priminti, segun Parlamentario Richard Arends cu a cuestiona e plan di personal.
Loke ta hunga un rol grandi den tur e desaroyo aki, segun fraccion di AVP ta e hecho cu gobierno a conoce un aumento di gasto di personal di 12 miyon den apenas 7 luna den gobernacion, caminda entre otro ta ser calcula cu lo a duna alrededor di 300 pa 400 hende trabou, si tuma na consideracion cu a manda 300 trahado cas liga na gobierno anterior. E punto aki a ser treci dilanti pa Raad van Advies como CAFT y for di e grupo aki no por spera cu gobierno lo bay manda su mesun hendenan cu a wordo recompensa, cas y laga nan sin trabou.
Den e proximo 52 dianan cu ta sigui gobierno tin e tarea di hinca presupuesto 2019 den otro y na mes momento presenta e cuenta anual 2017 na Algemene Rekenkamer, cual no a sosode ainda y riba dje mester presenta un prespuesto supletorio caminda tambe mester introduci cambionan cu a wordo acorda cu tanto CAFT como gobierno Hulandes.
E formula con Prome Minister y su gobierno ta bay haci esaki, no ta convincente. E plan di personal aki lo resulta den e reduccion nan di gasto premira.
Pa por logra esaki, tin indicacion fuerte cu e prome grupo cu lo bin na remarca pa bay cas, ta trahadonan cu no ta cumpliendo cu nan obligacionnan diario of cu nan produccion no ta cumpli cu locual ta spera di nan y asina lo purba cumpli cu palabracionnan haci pa reduci gasto di personal. Problema ta keda con lo bay logra e reduccion di gastonan aki y den cual ministerio y departamentonan di gobierno esaki lo tuma luga, ya cu ta bon conoci cu tin minister cu ta sigui tuma hende den servicio sin tuma na consideracion palabracionnan cu Prome Minister a haci cu Hulanda pero aki ta hunga un rol e hecho di presion politico con tin cu para e tipo di maniobranan politico aki.
