Diaranzon mainta tabata tin un encuentro cu e hefenan di departamento y un peticion di parti di gobierno pa un encuentro manera esaki. Tin dos tema cu a wordo atendi cu tabata na interes di Gobierno. Segun prome minister Evelyn Wever-Croes, gobierno ta kere firmemente den traha hunto cu e hefenan di departamento. Esey ta un di e prome decisionnan cu a tuma. Ta baha e cantidad di minister, ta baha e cantidad di conseheronan na cada bureau di minister y lo bay traha cu e hefenan di departamento.

Tabata un honor pa e prome minister pa por comunica cu nan y splica nan con importante nan ta pa Gobierno. E mes tabata un hefe di departamento 15 aña pasa y sa di e retonan cu nan ta biba cun’e. Prome minister kier sigura nan cu gobierno tey pa nan. Y si mester di nan pa yuda den gobernacion, nan por ta sigur di por conta riba gobierno. A toca temanan general y vision di gobierno.

Rol di un hefe di departamento den esaki y despues di e parti di Recurso Humano, tabata tin algun informacion general di maneho. Mas bien tema di functiehuis, salariering y cosnan asina.

 

Integridad

Integridad ta hopi importante y ta un tema cu prome minister a papia riba dje awe mainta. Con cu bay bin, tin cu bay den e direccion cu Aruba tambe ta cumpli cu reglanan di integridad. Pa logra esaki, tin cu haci’e na diferente nivel. E prome nivel ta pa pone e leynan in place. Esey ta parlamento y gobierno ta percura pe. E di dos ta cu mester tin’e riba nivel di ministernan y pesey lo bay bin cu un integriteitskamer, pa controla, revisa y scrutina proyectonan grandi y lo bin cun’e riba nivel di ambtenaar cu ta den e bureau integriteit cu ta trahando riba dje. Ta informacionnan cu ta comunica na nan tambe.

 

Functiehuis

Prome minister ta sali for di e punto di bista cu por haya hende cu tin e capacidad y e calidad cu bo tin mester riba cada funcion, si cu bo tin mucho metemento politico den nan. Tin cu traha cu perfilnan di funcion. Tin cu wak e persona cu bo ta tuma den servicio, si e ta cumpli cu e perfil.  E ora bo por haci’e. No ta wak un problema realmente den esey. Problema ta bin ora cu bo tin un perfil den un funcion. Manera un hende mester ta un hurista y bo ta pone un hende cu no ta hurista den un funcion. Ta pone safetyvalves den e sistema, cu ora un hende wordo poni riba un funcion y no ta apto of prepara pe, e ora eynan bo tin cu cambi’e pa uno cu si ta. Loke tin cu haci ta saca politica mas tanto posibel for di e nombracionnan aki y esey ta loke ta bay papia cu e hefenan di departamento y nan rol den esaki.