Gobierno di Korsou ta sera akuerdo ku Brock University di Canada

Gobièrnu di Kòrsou su empeño ta pa krea mas oportunidat di estudio di kalidat haltu pa nos studiantenan por desaroyá nan mes komo suidadadonan ehemplar nashonal i mundial.
Den kuadro di esaki Minister Marilyn Alcalá-Wallé di Ministerio di ESKD resientemente a firma un memorandum di entendimentu ku Brock University. Brock University ta situá na Canada, Ontario, den serkania di Niagara Falls.
Pa medio di e memorandum di entendimentu aki, nos studiantenan ta haña posibilidat pa bai studia na Brock University na tarifanan redusí. Tambe tin posibilidat pa apliká pa un beka di e universidat. Mas haltu e promedio di sifra di e último aña di enseñansa sekundario di e studiante ta, mas haltu e montante di beka ta bira.
E universidat ta brinda nos studiantenan e fasilidat pa sigui ku nan estudio riba nivel di bachelor, master i doktor riba tereno di matemátika i siensia, business, edukashon, humanidat i siensia sosial.
Brock University ta un instituto avansá di enseñansa ku ta konsistí di diferente studiantenan di diferente oriundo i tin un toke multikultural. Nan ta duna guía adishonal na studiantenan ku ta bini for di eksterior pa asina nan por integrá optimal i forma parti di e universidat i komunidat Canades. Na banda di esaki nan ta brinda sostén akadémiko pa fasilitá e traspaso di enseñansa sekundario pa enseñansa akadémiko.

Studiantenan di Brock University tin e oportunidat alabes pa traha durante nan temporada di estudio si nan ta desea esaki.

Pa mas informashon tokante kondishonnan i aplikashon por tuma kontakto ku Stichting Studiefinanciering Curaçao (S.S.C.) òf por wak riba e siguiente wèpsait: www.brocku.ca/international
Ta importante pa studiantenan ku ta deseá di risibí finansiamentu di estudio di S.S.C. tene kuenta ku deadline di aplikashon kual ta 15 di mart 2018. Mester akudí prome ku e fecha aki na S.S.C.
Si no ta deseá di risibí finansiamentu di estudio di S.S.C. mester tene kuenta ku fecha di deadline di aplikashon di Brock University, kual ta 15 di aprel 2018.

Por mira un video informativo di Brock University riba e siguiente pagina di Facebook: Minister van Onderwijs, Wetenschap, Cultuur & Sport

Riba potrèt por mira e momento ku ta firma e MOU ku representante di Brock University, sra. direktor, L. Keating, sra. direktor di maneho di Ministerio ESKD, S. Larmonie i konsehero finansiero di Ministerio di ESKD, sra. R. Reyna i Minister M. Alcalá-Wallé.