Gobierno di Aruba mester duna e prome incentivo pa hobennan por yega na un trabao

Glenda Hernandez, directora di Departamento di Asuntonan Social, a splica ta duna bijstand na un famia. Bo no ta duna bijstand na un persona. Bo ta wak e entrada di e famia.

Y hopi biaha e hoben ey ta yiu di un famia cu tin menos recurso. E ora bo tin cu bay wak cu el a caba scol, ta haya declaracionnan. Y e famia cu ta pidiendo bijstand, ta pidi pa e yiu, si e tambe por haya e bijstand.

Aunke cu sa, hopi biaha e hoben ta forma parti di e famia, ta wak kico ta su antecedente y por inscribi si por haya cu e por bay traha na DPL. Esaki ta un otro maneho compara cu Hulanda, unda cu nan ta bisa cu un hoben mester traha of studia te cu 23 aña, ta un tiki mas estricto. Na Aruba nos conoce e fenomeno aki y esey ta e maneho di e gobierno.

Segun Hernandez, sigur tin trabao. Locual cu bo ta haya hopi biaha ta muchanan no tin un ofishi concreto. Muchanan no a caba scol concreto. Bo ta haya cu tin un gap entre locual e dunado di trabao ta pidi, loke e mucha por duna. Den esey ta bay purba di breach e gap aki. Tambe hopi biaha ta wak muchanan tin e problema di disciplina. Muchanan no ta bin na tempo, muchanan ta cu headphone mientras cu nan ta trahando. Eseynan ta cosnan cu tin cu bay hala atencion riba dje. Hobennan, ora cu ta cuminsa den un trabao, tin cu cumpli cu cierto norma y reglanan y tambe mester sa con pa anda den un clima profesional. Y esey no ta tur ora e ta e caso. Den esey a keda di bay duna aporte tambe riba tereno di motivacion, con ta motiv’e pa e bay drenta den empleo. Segun Hernandez, Gobierno di Aruba mes mester duna tambe e prome incentivo y bin cu cuponan pa e hendenan aki haya un werk en leer traject, unda cu nan por wordo guia te ora cu nan bin na e experiencia ey pa cuminsa cu un trabao. Esey tambe ta bisa cu Gobierno tambe por tuma un iniciativa riba e tereno aki. Esey DAS ta apoya 100%.

Formacion social

Segun Hernandez mester cuminsa un caminda. A haci un analisis social. Februari el a bin cla despues di 3 luna, unda cu a wak tur cifra riba tereno social. Preocupante ta con e posicion di nos hoben ta na Aruba, tanto riba tereno di enseñansa, cu riba tereno di empleo. Pa nombra algun cifra of porcentahe, 4 di 10 mucha no ta haya nan diploma secundario y esey ta hopi preocupante. Pasobra esey ta nifica cu ta wak e muchanan aki ta cay atras, nan ta mas desemplea, nan chens pa bin na un empleo ta hopi chikito y e ora bo ta haya desaroyonan manera cu si no por haya un trabao, unda por haya un entrada cu si por biba di dje. Hopi biaha nan ta bay den mundo di criminalidad, pasobra nan falta un bon entrada. Esey ta logico cu ta haya cu e ta bay man den man. E futuro ta nos hobennan. Mester wak pa nos hobennan caba scol, keda na scol, sigui scol, haya un certificado. Si muchanan mester drop out, mester busca maneranan con pa yuda nan pa haya un opleiding pa nan haya un ofishi pa subi tereno laboral. Esaki ta hopi importante. Bo ta wak cu e desempleo ta mas halto den cualkier luga den e region. 18%. Ta papiando di hoben aki, 900 hoben, e por ta un grupo chikito, pero pa Aruba ta hopi grandi.

Tin un arsenal di hende cu ta para un banda cu eigenlijk mester wordo treci den movecion. Como mayor, hendenan di Aruba, mester percura pa hendenan, pa e hobennan aki haya un puesto, haya un educacion bon. Esey ta e reto cu Gobierno lo tin den e periodo cu ta bin.