Precisamente riba dia cu Corte a dicta un “orde maatregel” cu Gobierno no mag haci ningun cambio ni tuma ningun decision den Fundacion Lotto pa Deporte, pendiente e caso cu ta tuma luga dialuna 22 di januari, a cay e decision pa nombra e hunta di directiva nobo pa e fundacion. Nan a haya un “Decreto Gubernamental” pa traha 4 aña, di cual e Minister ta duna cada miembro un “honorario” di 2 mil florin pa luna. Normalmente e Presidente ta gana 3 mil florin pa luna pa atende reunionnan di Directiva.
Cu si e nombracion ta balido, lo sali na cla dialuna mainta 11:00am den Corte, ora Hues den e caso sumario lo mester analisa e caso, tene cuenta cu e demanda di ambos partido, revisa leynan, e statutonan di e fundacion y cu bista riba continuacion. E caso di Lotto sin duda lo bira e fundeshi y fungi como ehempel pa tur otro caso cu lo continua despues, pasobra na FCCA tin e mesun situacion, mientras cu directiva di AZV, IMSan, SVb y di FFD tampoco kier cede nan puesto pa e Gobierno nobo.
E miembronan
Den e decision di Minister Dangui Oduber, e ta nombra Marc Figaroa como miembro di e directiva, cu intencion pa e fungi como Presidente. Figaroa ta bini for di Aruba Airport Authority, unda e ta funciona pa algun aña caba, y cu hopi exito, den e departamento comercial di e compania.
Un otro miembro ta abogado mr. Elgin Zeppenfeld, cu ta traha na bufete di abogado Wix. E tin un amplio conocemento den e materianan di ley.
Otro miembro lo bira Ruben Kock, un pensionado, ex bisiña di e Minister. Alabes, Kock ta tata di Comisario Vanessa Tjon y e ta suegro di Parlamentario Rocco Tjon, lider di fraccion di MEP den Parlamento.
A postula tambe un otro hoben, Ross Franken, den e Hunta di Supervision di Fundacion Lotto pa Deporte, cu intencion pa e aporta cu su conocemento den deporte y den aspecto di finansa pa progreso di e loteria.
Finalmente, a postula Rubinah Bernadina den e Hunta di Supervision. Bernadina ta un docente di scol, pero alabes ta casa di Minister Chris Romero.
E caso sumario
E caso dialuna ta entama dor di e actual Hunta di Supervision di Stichting Fundacion Lotto pa Deporte, forma pa Silvio Janga como Presidente, mr. Benvinda de Sousa como Vice Presidente, Antoniun Kamperveen, Flavio Faneyte y Elias Kock como miembro. Nan ta conta cu asistencia huridico di abogado prof. Kunneman. Gobierno di otro banda a hinca nan defensa den man di abogado mr. Anthony Ruiz di e bufete di abogadonan Croes, Wever & Tchong situa den Arulex Building.
Mester menciona cu e decision di Hues di dia 10 di januari 2018 ta stroba ehecucion di e Decreto Gubernamental, pero lo laga e nombracion ‘pendiente’ e decision di Hues den e caso sumario di dialuna 22 di januari pa 11:00am den Corte. No ta conoci si Corte lo tuma un decision mesora, of si lo tuma dos siman pa dicidi. Den e caso sumario e Hunta di Supervision di Lotto ta pidi Hues pa prohibi Gobierno di mete cu nan nombracion, te dia cu Corte den “Bodem Procedure” dicidi otro. Esey claro lo dura algun luna mas di tratamento.
Historia di benta di Lotto e ultimo añanan
Lotto di Aruba a conoce un benta di mas cu 41 miyon florin na aña 2013. A nota un aumento barbaro na 2014 alcansando mas di 49 miyon florin. Na aña 2015 e benta a cay un poco na 48 miyon, a cay na 2016 na 47 miyon, pero a bons bek duro na 2017 ora cu a alcansa e suma di Afl. 50.478.681,= na benta total, cu ta representa un crecemento di 6.6% compara cu e aña anterior.
Lotto pa Deporte
Fundacion Lotto pa Deporte ta existi entretanto desde aña 1982 caba. Durante e ultimo decadanan, e loteria a modernisa, a digitalisa, cu ta haci cu e sorteonan ta mas sigur, miho organismo di control y ta haya sa resultado mesora. Ta conta cu mas di 180 rebendedonan di Lotto di Aruba, situa tur rond di nos isla. Fundacion Lotto pa Deporte ta orguyoso cu, hunto cu e compania operado CBNA di Aruba, ta emplea casi 30 trahado, di cual tur ta Arubiano.
Lotto ta haci aporte grandi den economia
Separa di e mas di 110 miyon florin paga na premio e ultimo 5 añanan, Lotto ta paga un averahe di 5 miyon florin pa aña na comision na rebendedonan y sin lubida BBO na Servicio di Impuesto. Tur esaki ta afecta nos economia den forma positivo. Di e forma aki e fundacion ta aporta grandemente na nos economia y ta sostene nos hendenan.
