Gobernador Boekhoudt a tene su prome discurso na ocasion di apertura di aña Parlamentario Un discurso elocuente tocando varios tema, di deseo y anhelo di e pueblo, di oportunidad y idealnan

Gobernador Boekhoudt a tene su prome discurso na ocasion di apertura di Aña Parlamentario nobo 2017-2018. Un discurso elocuente unda el a pasa riba varios topico cu ta regarda pais Aruba y su hendenan. Boekhoudt a para keto na e situacion horibel cu ta reina na Sint Maarten y demas islanan despues cu e horcan Irma a pasa y a laga un situacion caotico y alarmante atras.

” Pareu cu e forza destructivo a surgi un forza genuino di hermandad y convivencia. Irespecto di e distancia ayudo a y ta sali di tur skina di nos Reino pa brinda sosten y asistencia na e damnificadonan”. Gobernador a papia riba e maneho y escogencia di Gobierbo y Parlamento cu ta wordo refleha bek den e necesidad y anhelo di pueblo, di oportunidad y idealnan.

“E cambionan grandi y desaroyo acelera di Aruba den e ultimo decada ta haci cu Gobierno y Parlamento mester balansa awor mas y den forma mas concreto, e crecemento economico di nos pais, cu e cuido di medio ambiente y e deseo pa mehoracion social cu ta biba den comunidad.  E balansa aki ta forma e base di un desaroyo sostenibel. Cu e fin aki, Nacionan Uni a defini 17 meta pa asina garantisa un desaroyo duradero y un prosperidad comparti. Gobierno di Aruba a compromete su mes completamente na realisacion di e Metanan di Desaroyo Sostenibel aki na Aruba. “

Tambe Goberndor Boekhoudt a para keto na e forma con gobierno di Aruba a anda cu su presupuesto. “Di un manera excepcional, Gobierno di Aruba a presenta un concepto di presupuesto pa aña 2017 cu un deficit di 0.5% di GDP. Esaki ta di acuerdo cu e normanan acorda den e ley di supervision financiero temporal. E ta nifica e continuacion di e proceso di reduccion di e deficit riba presupuesto di Gobierno di Aruba y e caminda directo pa reduccion di e quota di debe.” Palabranan alentador pa loke ta e futuro di finanzas publico di Aruba. Esaki no a bin sin mas.

“Esaki ta resultado di e esfuerzo grandi di hopi hende pa presenta un perspectiva real pa reduccion di e debe nacional di e ultimo 31 añanan. E logro aki a sosode riba nos propio forsa, basa riba un maneho financiero estricto, combina den futuro cu un crecemento economico modera. E esfuerzonan aki no mag di bay envano y e sacrificionan mester wordo salvaguardia.”

“Nos ta bibando den un era di transicion riba tereno economico, financiero y di energia, di cambionan social y tecnologico, di necesidad di desaroyo urbano cu enfoke pa preservacion di naturaleza, cu tin un impacto grandi riba tur loke nos planea  pa haci y haci. Den e contexto di e cambionan continuo y profundo aki, un maneho di Gobierno basa riba e metanan di desaroyo sostenibel, ta e miho compas pa haci e transicion aki. E maneho pa un desaroyo sostenibel ta sigura un balansa entre e balor agrega di nos actividadnan economico, infrastructura, naturaleza y calidad di bida di nos hendenan.”