Contrario na antes, unda Glenbert Croes tabatin contactonan directo cu top di PDVSA na Venezuela y a interveni na mas di un ocasion, awor aki e no por mas. Den pasado hasta partido MEP a felicit’e cu ta danki na dje refineria a habri na Aruba. Pero awor cu ta momento di reto, Gobierno no ta dunand’e e chens pa sali padilanti y deal direct cu e refineria. E ta masha straño pasobra si ta Glenbert Croes tin tur contacto, lo ta mas facil pa e cay den e crisis aki.
Awe durante un entrevista cu 24ora.com, e mandatario a corda cu tempo e tabata Parlamentario, e tabata bula bay Caracas y eynan deal cu e Venezolanonan di PDVSA y asina via su contactonan, pusha pa e refineria bin habri na Aruba. Den campaña el a uza CITGO como un di su temanan principal, a atende cu e contratistanan y a move masha pa pusha e proyecto aki.
“Pero awor mi no tin e libertad ey mas”, asina el a bisa awe. “Mi no tin duda cu meta di nos Gobierno ta pa e refineria habri”.
Mas leu el a aclaria cu como Minister di Labor su autoridad ta cuminsa y caba na asuntonan laboral. Pues e no tin e autoridad, ni e mandato di Conseho di Minister, pa cana dilanti den e negosacionnan cu e refineria riba nan financiamento y e proyecto completo di rehabilitacion di e Refineria di Aruba.
“Mi no tin e libertad manera antes, riba mi mes, riba mi propio camindanan, haci esfuersonan paralelo loke mi propio Gobierno ta haciendo. Mi tin confiansa si cu Minister di Energia lo haci su maximo esfuerso pa sigura trabou di e trahadonan”, asina e mandatario a vocifera, mandando un señal directo na Minister Presidente Wever cu a opta pa no duna Croes e cartera di Energia, pero cu den menos di 100 dia ta haye cu un batata basta cayente pa resolve.
