Hedging ta un tema cu semper hende ta comenta riba dje. Segun director di WEB, Luis Oduber, e status ta cu a hedge te cu fin di Maart. Despues di Maart, esta April, te cu awo, no a hedge mas. Esey ta riba instruccion di e accionista Utilities, riba peticion di Gobierno.
Kico e ta nifica
Segun Oduber, hedging tin su cierto riesgonan. E ta un seguro. Manera cu a implement’e den e ultimo aña, tabata un seguro. Ta paga un premie pa bo por garantisa cu bo prijs di fuel no ta subi mas cu un cierto suma y esey ta locual cu decision a bin pa sigui cun’e.
Motibo
Motibo ta cu, segun Oduber, bayendo bek den tempo, a causa cierto daño na Aruba. Segun cu a bisa, Aruba a paga un prijs mas halto mientras cu e prijs riba mercado a baha. Pero pa e ultimo dos aña a bin ta cumpando un premie pa hustamente frena cu na momento cu e prijs subi, ta paga un prijs mas caro.
Desaroyo di prijs di bari
Na e momentonan aki, na momento cu haya un cargamento nobo, ta bay paga prijs di e momento ey. Sea ta a base mensual, a base di averahe. E prijs ey lo bay paga. E tendencia ta cu e ta subiendo. Consecuencia ta cu ta bay paga un prijs di fuel mas caro.
Ken ta paga e prijs
WEB ta esun cu ta paga e prijs na prome luga y ta haciendo ehercisionan pa mira te unda cu por absorba e aumento y na momento cu no por absorba esey mas, ta informa e accionistanan cu tin cu tuma paso.
Con trankil pueblo por ta
E prijs ta subiendo di fuel oil y di bari. Esey ta nifica cu ta posibel cu por pasa e prijs pa pueblo. Internamente WEB ta haciendo su maximo pa eficiencia y tambe reduci gastonan cu kisas por laga pa otro aña of despues. Ta yega un dado momento cu si no logra e metanan cu ta stipula pa e accionistanan, e ora tin cu tuma paso pa por logra e metanan y e metanan ey por ta ahuste di tarifa.
Ahuste di prijs
Oduber a splica cu na e momentonan aki prijs di fuel ta mas halto. Expectativa ta cu e ta sigui subi. Pero di un otro banda ta bisa cu e lo baha bek. Por tuma paso awor aki, pero kisas aki paar di luna e lo baha bek of e ta un prediccion. Loke a haci internamento e ehercisionan, calculacionnan y mira te na unda, como compania ta responsabel pa tum’e, sino dado momento no por mas, lo bati na porta di accionistanan.
Si ta laat pa hedge
Tur cos tin di haber cu e prima cu ta paga pe. Segun e prijsnan ta aumenta, ta paga un prima mas halto. Ta basicamente e tipo di hedge ta bin ta cerando e ultimo tempo.
Pa educacion general, tin diferente forma di hedge. Por hedge loke ta un swap. Kisas no ta paga mucho of ta paga practicamente nada. Ta mar’e na e prijs di e momento ey. Of tin call of put. Den caso di call ta pone un prijs maximo. Ta fiha un prijs maximo. Ta paga naturalmente depende con e mercado ta moviendo. Si e mercado ta hopi instabil, ta paga un prijs mas halto di e seguro. Si e mercado ta stabil, ta paga menos pa e seguro. Tur esey ta na e momento cu bay tuma e paso, tin cu wak kico e ta costa.
E por varia entre algun dollar y naturalmente depende na ki momento ta tuma accion. Si tuma accion, ta paga un prima mas halto.
Baha prijs di awa y coriente
Awor aki WEB ta evaluando y bahamento di awa y coriente ta keda un deseo di e consumidor. Pero tin e responsabilidad pa maneha e planta y naturalmente pa garantisa e suministro. Tin cu haci e ehercisionan, pa na final logra e metanan cu ta wordo stipula hunto cu e accionistanan. Si accionistanan cambia e metanan ey, e ora tin un otro ilustracion pa deal cun’e.
