E tabata sinta tras di su lessenaar trahando dialuna mainta ora cu diripiente nan ta yame bise cu Minister Andin Bikker a caba di anuncia cu e no ta Director di Migracion mas y cu e lo bay na disposicion di e mandatario pa drenta un commission. “Mi no a yega na ningun acuerdo cu e Minister. Esaki si ta straño”, esey tabata su prome reaccion ora a yame puntre kico a pasa.
Vingal ta corda cu for di momento cu Gobierno nobo a sinta a cuminsa insinua cu lo kier e puesto ey y a ofrece varios otro funcion. Recientemente atrobe Minister a sinta cune y a bise cu e no ta popular bou di e trahadonan. El a splica Minister Andin Bikker cu e ta haci su trabou. E grupo di trahadonan rabia ta pasobra nan tin hopi AO y no a haya nan promocion na ora. Vingal, di acuerdo cu reglanan di Gobierno, a wanta e promocionnan cu 6 luna y di esunnan cu si ta traha sin AO, a bay prome. Esaki el a haci den consulta cu e trahadonan y nan sindicato di antemano. Pero ta parce cu toch no tur ora Gobierno ta aprecia cu su directornan ta defende nan interes y no ta otorga “bevordering” asina sin mas.
Di e comision cu e lo bay aden mes e no sa di nada. Minister a pidie bay cas algun siman atras pa pensa si e lo kier tuma un otro funcion. El a pensa bon y a contesta e Minister cu e no ta bay ningun caminda y cu si nan kier kit’e, nan lo mester tin motibo valido. Asina mes awor a anuncia cu ta bin un Management Team, den cual dos Polis lo tuma maneho di Migracion over.
Desde e anuncio aki, Gerald Vingal a haya un cantidad di yamada, e-mail y mensahenan via whatsapp di instancianan internacional cu a keda babuca cu e decison aki. Vingal ta reconoci den e industria aki y specialmente despues di e introduccion exitoso di Happy Fow y otro sistemanan moderno cu nos ta uza pa procesa mas pasahero posibel na nos Aeropuerto. Partnernan manera US Customs and Border Control, Koninklijke Marechaussee y varios otro instancia mas na Hulanda, Merca, Canada y den nos region a keda asombra cu e forma con Gobierno di Aruba ta persigui Directornan.Tocante Gerald VingalGerald Vingal a studia Bestuursrecht na Hulanda y a profesionalisa su mes den leynan y derechonan laboral. Despues di su estudio el a cuminsa su carera na Aruba den Cuerpo Policial Aruba, sigui pa Departamento di Recursonan Humano, tabata Consehero di Minister di Enseñansa y despues a aplica y bira Director di Migracion Aruba. El a logra optimalisa e departamento y a ricibi reconocimento internacional entre otro pa ehecucion di e proyecto “Happy Flow”.
Tendencia di “Bula nan cabes”
Den pasado, bou Gabinete Oduber, e tendencia di kita hefenan di departamentonan di Gobierno a bira popular. E mesun Andin Bikker, e tempo ey cu PDR, a propaganda e tendencia aki contra MEP den campaña di aña 2005. Pero ta nota cu e ultimo lunanan atrobe e tendencia aki a lanta cabes.
Migracion Aruba ta un departamento nobo
Entrante dia 1 di september 2017, oficialmente Instituto Alarma y Siguridad Aruba (IASA), funda tempo di Minister Rudy Croes, a stop di existi. Na su luga a funda Migracion Aruba, cu Gerald Vingal na cabes. E departamento aki ta atende tur asunto di migracion na aeropuerto y wafnan, mientras cu Warda nos Costa a pasa tambe bou di nan.
Tocante Migracion Aruba
A introduci e ofishi di ambtenaar di Inmigracion dia 19 di maart 1969 bou di Cuerpo Policial di Antias, den e departamento “Sectie Vreemdelingen Politie”. Dia 1 di september 2002 a los e departamento for di Cuerpo di Polis y a inclui den e organisacion nobo DINA (Directie Immigratie en Naturalisatie Aruba). Cuater aña despues na 2006 a elimina DINA y a crea IASA (Instituto Alarma y Siguridad Aruba) unda a aloca Radar 911, Warda nos Costa y Servicio di Inmigracion.
Aunke cu e intencion inicial tabata pa dia 1 di januari 2017 crea un solo instancia, Migracion Aruba cu dos componente, esta “Grenscontrole” conoci como Servicio di Inmigracion na Aeropuerto y na wafnan y “Vreemdelingentoezicht” conoci awendia como Warda nos Costa, toch no a logra keda cla te awor dia 1 di september cu e cambio ta drenta na vigor.
Migracion Aruba ta consisti di mas o menos 60 empleado mientras cu Warda nos Costa ta conta cu mas o menos 17 empleado.
