Fundacionnan a uni y a entrega keho contra maltrato di e dos cachonan na polis

Por a tuma nota di un grupo di persona, cu ta 100% contra maltrato di bestia. Y mirando cu nan a sigui e desaroyo di e forma cruel cu un persona ilegal di Venezuela a corta un cacho na Tanki Flip, a duna nan suficiente motibo y forsa pa nan yega na warda di Shaba pa haci un denuncia, mirando cu nan tin un grupo cu a rescata e cacho aki y mester a bay hib’e pa e haya tratamento medico.

A conversa cu Zoe Konijn, kende a conta un tiki riba loke ta e decision cu nan a tuma pa yega na warda.
Zoe Konijn ta presidente di Luna Foundation y tambe ta traha cu Criyoyo Trappers y Animal Relief Foundation y a conta cu e cachonan cu nan a rescata ta bayendo hopi bon. Konijn a bay bishita e cachonan na Animal Care Clinic na Paradera. E cacho bruin cu a haya mas tanto daño, a wordo corta. El a haya mas cu 30 sticht. E cacho blanco, tambe tin 2 corta, pero no tabata tin mester di stitch. Nan tin miedo, cual ta normal. Ta algo traumatico cu nan a experencia, pero nan ta bayendo ok.

A mobilisa
El a sigui conta cu e cos cu ta straño ta cu a bay na e cas. El a sosode diamars atardi. Ningun hende no a yama ningun fundacion, esey ta loke ta duel Konijn, pa bay busca e cachonan. Diaranson, ora cu e noticia a subi riba Facebook, cu a wak’e, yen di hende a tag y puntrando riba e puppiesnan. Ningun hende no a bay busca nan. Puppies cu ta sangrando. Hasta polis a laga nan pa nan cuenta y esey no por. Luna Foundation, hunto cu Trapper Team, a bay e cas, nan a mira e cachonan ta cana rond den cura. Esun bruin cu su heridanan. E bruin por a gara. E blanco a drenta un di e haulanan pa hiba nan veterinario.

Yudansa
E fundacionnan kier pa tur hende compronde cu loke a pasa cu e cachonan no mag. Tin di compronde cu e mucha muhe den esaki ta un menor di edad y tin problema mental. Pero loke a pasa cu e cachonan, esey no mag. Pa Aruba sa cu lo no acepta loke a pasa. Ta pesey e fundacionnan tey pa haci un denuncia, pa wak con nan por duna un straf na e hoben aki, cu a haci algo. Pa e tambe compronde cu no por.

Oido
Recherche a tuma declaracion di Konijn y a reacciona hopi bon. El a compronde pakico e grupo a bin, pa kico tur e otro fundacionnan a bin hunto. A firm’e. E di e ta bay oficier van justitie. Nan tin cu dicidi kico ta bay pasa. El a recomenda pa duna e keho mas forsa pa skirbi un carta pa minister. E ora tur fundacion por firma loke kier pa sosode pa cuida nos bestianan riba e isla.

Gastonan
A pidi yudansa den corant, riba Facebook, di nos localnan y tambe hendenan di exterior. Ta hayando donacion. Aunke cu ta chikito 1 florin, 50 cent, tur aporte ta yuda. No ta algo barata pa tin dos cacho na veterinario. Ya e gastonan pa e fundacion ta banda di 700 florin y nan tey un dia so. E operacion tabata basta caro, pero mester haci’e pa e cachonan. Pa por salba nan. Nan ta puppies di cuater luna. Nan ta baby ainda.

Doño
Segun polis, e cachonan no tin doño. E mucha muhe no ta nan doño. Awo e cachonan ta di Luna Foundation. Ora cu tur cos ta ok cu nan, ta bay busca un doño nobo cu tin amor pa bestia.

Unda por haya Luna Foundation
Por busca Luna Foundation riba Facebook. Por haya Luna Caring Team, hasta Criyoyo Trappers. Tur ta traha hunto. Tambe por bay na Animal Care clinic cu ta e veterinario na Paradera. Eynan nan por stort placa riba e cuenta di Luna Foundation na e Veterinario.

Mensahe
Esaki no ta un caso unico. El a bira unico pa Aruba door cu e ta un ilegal segun Konijn. Pero tin hopi maltrato ta pasando riba nos isla. Nos mesun hendenan mester tin mas amor pa nos bestianan. Si bo no kier un animal, no tum’e. Si bo mester di ayudo, acerca un di e fundacionnan pa por yuda. Aruba por mihor cu nos animalnan.