Fraccion di MEP tabata na Ministerio Publico pa entrega un keho diahuebs atardi. Lider di fraccion Rocco Tjon a splica cu ta trata aki di un onderzoeksrapport.

 

Kico ta e onderzoeksrapport

E antecedente di sr. Tjon ta di husticia. Ta usual cu ora pidi ministerio publico pa start un investigacion. Prome bo mes ta haci un investigacion. A bin ta anuncia esaki durante campaña. Varios caso a tuma luga den pasado cu a causa hopi inkeitud bao di comunidad y ta condena e actonan aki. Integridad y bon gobernacion ta importante pa e fraccion. Esaki ta e motibo cu esaki, den concepto di hopi hende, el a tarda. Pero ta importante pa ora entrega un producto, e no ta a base di rumores, sino di echonan. Pesey e fraccion a haci su huiswerk prome y a entrega un onderzoeksrapport awe, cu echo y prueba na ministerio publico, cu e peticion pa nan wak esaki y start cu un investigacion.

E parlamentario a agrega cu fraccion di MEP ta para pa un politica nobo. Nan ta para pa bon gobernacion. Pesey tambe, si mira e acuerdo di gobernacion, e aspecto di integridad y bon gobernacion ta haya su atencion. Pesey tin cu bisa cu e ta orguyoso cu e por lidera e fraccion aki pasobra su colega, Edgard Vrolijk, dialuna tambe lo entrega un ley di iniciativa, pa asina pa ley tambe reglamenta loke ta screening y integridad di ministernan. Ta calcula en todo caso pa fin di luna, comienso di otro luna tambe, lo entrega e ley di iniciativa pa loke ta trata financiamento di partidonan politico. Esey tabata e combersacion tambe cu fiscal majoor.

Algun siman pasa fraccion di MEP a cuminsa cu su bishitanan na tur departamento pa asina asumi nan responsabilidad y haci control den parlamento como debe ser. Por corda cu den oposicion a cherche como si fuera a haci e bishitanan pa haya sa con pa traha presupuesto. Ta haciendo e bishitanan aki pa haya sa kico ta e prioridad y dolornan di e departamentonan aki. E fraccion ta contento ora cu nan a sinta dos siman cu procurador general kende a bisa cu un di e cosnan pe ta importante, pa pak aan ambtelijke coruptie y mina criminalidad, esaki ta netamente loke tin ancra tambe den e acuerdo di gobernacion y pa loke MEP ta para pe.

 

Keho contra ken

Tjon a sigui splica cu ora bo wak kico a bin ta campaña cun’e, tin diferente caso cu nan a bin ta condena, cuestiona y caminda cu den concepto di e fraccion, te hasta no solamente violacion di procedura pero tambe hechonan castigabel. Por ehempel hospital, hedging, partimento di tereno, djis pa menciona algun.

Un palabracion cu a haci cu ministerio publico tambe awor aki ta cu di parti di fraccion di MEP, nan no lo divulga kico e caso ta y ken tur ta bin p’adilanti y e motibo ta, pasobra no kier pa esaki wordo gestempel como persecucion politico. Loke mester ta central ta e berdad sali na cla y esaki ta hopi importante, no solamente pa e actonan cu a bay hopi robes den pasado, pero importante tambe pa restaura confiansa den politica. Pa pueblo wak tambe, cu fraccion a bin ta haci loke nan a bisa cu nan a bin pa haci. Pero en particularmente bin claridad riba e casonan aki. Pa restaura e confiansa den politica, a bin cu diferente ley cu ta bay wanta nos mesun ministernan di e partido mes cu ta wordo sosteni, responsabel tambe pa nan actonan.

Tjon a enfatisa cu loke ta trata e caso y esaki ta conta pa tur caso hudicial, prome cu cuminsa investiga uno, tin e informacion, tin cu cuadra e informacion, e ora por bay mira e hecho y circunstancianan. Ta bay onderbouw’e, door di documentonan di produccion. Ta bay wak Modus Operandi, ta bay wak un netwerk y tur esaki a trece p’adilanti. Tur esaki tambe ta wordo entrega na ministerio publico y awor aki e ta den nan posesion, completamente acaba. Obviamente fraccion di MEP, su autoridad ta limita. Ministerio publico tin mucho mas autoridad. Nan tin e hermentnan hudicial pa por haci e investigacion aki mas profundo. Ya caba, cu loke cu e fraccion a entrega, ta sigur cu tin diferente instrumento pa Ministerio Publico cuminsa cu nan investigacion.