Food Truck Festival: Un evento cu cuminda entretenimiento pa tur bishitante

Diabierna anochi dia 27 di april y diasabra anochi 28 di april di 7’or pa 11’or lo tuma luga e di dos edicion di e asina yama ‘Eat Local Food Truck Festival’, organisa door di Aruba Tourism Authority. Esaki lo ta na Plaza Daniel Leo y e cayanan den cercania. E motibo tras di e evento ta pa localnan por intercambia cu nos bishitantenan y pa e bishitantenan conoce un diferente aspecto culinario y autentico di nos isla.

Despues cu e prome edicion di e festival aki a wordo hopi bon bishita, a opta pa e aña aki lo uza un espacio mas amplio pa e comodidad di e publico. Ademas, band’i mas cu 10 truck di cuminda, lo tin un variedad di otro tipo di cuminda tambe.

 

E participantenan di cuminda pa e di dos evento annual di Eat Local Food Truck Festival ta:Truck di Piet, Poffertjes van Pofferdorie, Nos Local Snack Truck, El Mexicano, Skina Crioyo Truck, The Little One/Hollywood Smoke House, Ice Cream Truck, Eataly, Candela, Burger Joint, Taki, D’abaru, E Sushi Shap, Happy Appy’s Shoarma & Patat, Robert’s Smoke Pit y Gellatisimo. Participantenan di bebida lo tin presente Aged Wine Bar y Craft Beer Lovers.

 

Band’i e cumindanan sabroso, e evento ta un experiencia unico. Durante e dos dianan tin entretenimiento cu musica bibo di e.o Jeremy Bonnariba, Sergio & The Short Cuts, Jersy Sofia, Xavi & Rhea, Lily Rodgers y Mirugia de Cuba. Pa esnan cu ta bishita e evento cu muchanan chikito, tin un ‘Kids Corner’ interactivo en cooperacion cu Universidad di Aruba, cual ganashi di esaki lo bay pa Bloedbank Aruba.

Ademas ta bay tin un area dedica na nos tradicion popular di weganan di Domino, unda publico por hunga na e mesanan y lo tin competencia henter anochi. Pa e amantenan di un bon siga: Aruhiba lo ta presente cu su seleccion di siga.

 

Pa por sirbi e publico miho a scoge pa traha cu e sistema di ‘token’. Cada token lo tin un balor di AWG. 2,50 cual ya caba por wordo cumpra adelanta na Road Side Café (situa na Linear Park) for di 5’or di atardi. Na e evento mes tambe tin dos stand pa cumpra token, di cual un stand ta solamente pa transaccionan cu carchi ATM y e otro lo ta tanto cash como carchi ATM. Entrada pa e evento mes ta gratis.

Tuma nota cu en conexion cu evento di ‘Eat Local Food Truck Festival’ dianan 27 y 28 di april e cayanan den cercania di Plaza Daniel Leo lo ta parcialmente cera. Aki ta trata di Schelpstraat / Emmastraat / Klipstraat y Havenstraat. Ademas, diasabra dia 28 di april Arutram lo no ta coriendo debi na e logistica di e festival.

 

E comunidad di Aruba y nos bishitantenan ta wordo spera pa asina disfruta di un experiencia culinario den un dushi ambiente fin di e siman aki.