E compania Fuels Marketing Supply Aruba (FMSA) a reconoce Mario Alcaldo Croes – miho conoci como Aiky Croes, un persona conoci den e mundo di dealer di combustibel. El a inicia su carera den Colony na aña 1960, como empleado di e stacion di gasolin di su tata Francisco C. Croes y por ultimo como dealer di e stacion di gasolin na Savaneta, awor conoci como CITGO Savaneta.
Un carera di 58 aña cu seguramente ta di admira. Na mes un momento, FMSA a reconoce Elva Croes-Tromp — miho conoci como Elsa Croes casa di Aiky Croes, pa su añanan di servicio na e stacion di gasolin di Savaneta. Elsa Croes a traha 53 aña na e dealership di famia Croes, el a cuminsa su carera como empleada y despues como accountant di e dealership.
Diabierna ultimo, FMSA a invita Sr. y Sra. Croes pa un lunch dedica specialmente na nan añanan di servicio cu e diferente companianan di “Marketing & Supply”, cuminsando for di Lago te cu awor cu e compania Fuels Marketing & Supply Aruba N.V.—e compania principal cu ta distribui gasolin ariba nos isla cu ta resorta bou Refineria di Aruba N.V. (RdA).
E atardi tabata den un ambiente sumamamente ameno, invitadonan tabata tin e oportunidad di reviva y comparti algun memoria y anectodonan trahando pa y cu e dealership. Na final di e lunch, Alvin Koolman — CEO & Managing Director di RdA, a duna un discurso cortico pa asina mustra su aprecio y duna danki na Sr. y Sra. Croes pa nan añanan di servicio, sigui pa Sergio Schwengle, Glenn Geerman, Marlon Werleman, Rudy Croes y por ultimo Aiky Croes.
“Mi ta pasa e dealership pa mi ruman Rudy, esey no kiermen cu mi no lo ta para patras di porta pa wak kico e ta hasi” ta loke Aiky Croes a bisa cu a pone tur presente hari.
Ta importante pa menciona cu e aña aki ta cumpli 65 aña cu famia Croes tin e dealership, un logro cu seguramente ta di admira y reconoce. Rudy Croes a elabora ariba e cambio nan cu lo bai bin na CITGO Savaneta den futuro cercano, y ta ancioso pa innova unda esaki ta necesario pa sigui padilanti cu e dealership di famia Croes.
Por ultimo, a termina e atardi deseando Sr. y Sra. Croes tur clase di exito cu nan añanan di “oro”, nan añanan di pensioen y pues tambe exito na Rudy Croes cu awor lo ta e dealer di CITGO Savaneta.
