Director di Fundacion Museo Arubano (FMA) Anky Vrolijk y Curator di FMA Renwick Heronimo a bishita Cas di Aruba. Na e ocacion aki e ehecutivonan di FMA a papia cu Minister Plenipotenciario Guillfred Besaril y cu Representante di Aruba na Union Europeo Eddy Paris.
Meta general di e combersacion tabata – pa loke ta trata FMA – pa cuminsa un combersacion pa asina investiga e posibilidadnan pa sosten mutuo relaciona cu e presentacion di nos herencia cultural di e mihor forma posibel.
FMA a bisa di ta mira un papel importante pa e Minister Plenipotenciario pa Aruba den Reino unda cu por haya acceso na un network di contactonan sumamente valioso pa Aruba relaciona cu e aspecto di herencia cultural cu otro ministerio y organisacionan.
Tambe a papia riba e aspecto di Arubahuis como un posibel showcase di locual Aruba tin pa ofrece y posibilidadnan pa colaboracion den esaki.
‘Tabata sumamente placentero pa dialoga riba e aspectonan humano, social cultural y politico cu un minister cu ta representa un biento fresco, entusiasmo, y tactica pa cu e reto cu e funcion nobo aki ta trece cu ne’, asina e director di FMA Anky Vrolijk a bisa
Sra. Vrolijk y sr. Herononimo di FMA tambe a hiba combersacionnan cu representate di Aruba na Union Europeo Eddy Paris. Cu sr. Paris a papia di e aspecto di herencia cultural comparti cual ta e aspecto cu ta forma e puente entre Aruba y Union Europeo. Relaciona cu esaki Fundacion Museo Arubano a indica dos projecto specifico pa cual lo hasi peticion den e proximo añanan na Union Europeo y cual ambos ta pertenece na e herencia comparti aki. Anky Vrolijk: ‘E interes, conocemento y afinidad cu nos herencia cultural ta representa, ta mustra di por duna forsa na e peticionan aki. Ta na nos generacion e responsabilidad di salvaguardia e herencia cultural di Aruba pa futuro generacionan.’
Como aprecia pa e bunita recepcion Anky Vrolijk a haci entrega di un ehemplar di e buki “Het Oude Fort van Aruba” di dr. J. Hartog na Minister Plenipotenciario Guillfred Besaril.
