Durante e siman di 28 di Mei pa dia 3 di Juni, Flex Team a realisa un vigilancia nacional.
Den e caso di encuentro na luganan conoci manera Manuelitos, Hotel Bacarat (cera), casnan di pueblo na Noord, Madiki, casnan di pueblo na Sero Patrishi, un biaha mas a trata nan cu man duro.
A controla localidadnan manera Lekker, De Olde Molen y Cas Casuela y a percura pa despues di ora di ceramento tur hende bay cas mas pronto posibel
Aglomeracion na Eagle Beach
Tur grupo cu a para na Eagle Beach durante oranan di anochi, y tabata consumiendo bebidanan alcoholico y teniendo musica halto, a atende cu nan y cori di e sitio. Esnan cu tabata tin cualkier sospecha riba nan, a controla nan. E gruponan a sigui pasa diadmingo anochi te den oranan laat cu musica halto. Te cu 11’or di anochi, a tolera musica riba un volumen abao.
Aglomeracion riba parkinglot di The Village
Tur hende cu durante oranan di anochi tabata para riba e parkinglot di The Village, y tabata consumiendo bebidanan alcoholico, a ricibi scual y cori di e sitio. A controla esnan cu tabata tin sospecho riba nan
Accion hunto cu Atraco Team den Brikstraat
Riba diahuebs, 1 di Juni, 2018, a haci un inval den un cas den Brikstraat door di personal di Atraco Team. Eynan a bin haya ocho persona ilega. A detene nan a base di ordenansa di admision y expulsion y entrega na personal di IASA.
Detencion di K, A, RL y A na altura di Reaumerstraat
Diabierna, 1 di Juni, banda di 11’or y 20 di mainta, central ta manda patruya cu urgencia na e T-kruising di Edisonstraat y Reaumurstraat pa un pelea entre dos grupo y cu lo tabata tin un arma di candela envolvi. Un rato despues central ta meld cu cuater persona envolvi lo tabata den un Ford Explorer cora y cu e vehiculo lo tabata den Daltonstraat. Cu e personanan lo tabata tin un arma di candela den nan poder den e auto. Polis a bay di biaha eynan. Via portofoon a informa cu e auto envolvi tabata direccion p’ariba den R.Fultonstraat.
Yegando den R.Fultonstraat, a mira berdad un Ford Explorer cora coriendo direccion p’ariba. Ora a yega cerca a mira cu tabata tin cuater persona den e auto. Den cuadro di esaki a para e auto. A logra par’e na e t-kruising di R. Fultionstraat y Scopetstraat. Durante cu e pasahero parti patras banda drechi a bay pa sali for di e auto, a scucha algo manera cay abao. Despues a bin resulta cu un artefcto bruin tabata un man di eun arma di candela. Polis a bay lusa den e auto y a mira riba e sienta drechi patras, un obheto preto parecido na un arma di candela.
Den cuadro di esaki e sospechosonan RL, naci na Huland, K. naci na Hulanda, A naci na Aruba y A naci na Aruba a keda deteni.
Supervision na Rancho Villa Floralina
Durante fin di siman, a bay controla den vecindario di Villa Floralina na Moko den cuadro cu un festival di musica. E luga tabata bon bishita.
Control
A controla varios auto y a confisca un cantidad chikito di marihuana, sakitonan di cocaina, algun piedra di cocaina, sker, cuchiu, grinder.
E tene un total di 140 control.
Tambe a detene cinco persona. Cuater pa a carga arma y uno pa coremento bao di influencia.