Ken no conoce Centro di Bario Tanki Leendert. E ta riba e caminda principal di Kibaima-Tanki Flip. Ta buscando sosten di fondo pa drecha e luga aki.
Ricardo Irausquin a conta riba un actividad cu nan tin, un Telethon pa asina recauda e fondonan necesario pa drecha e localidad aki cu hopi ta uza.
E evento aki lo tuma luga e fin di siman cu ta bin. Intencion ta pa recauda fondo pa asina e Centro di Bario haya un renobacion completo. Durante aña e centro di bario a haya diferente touch up, un man di verf, drecha algun cos. Pero despues cu e Centro di Barionan tur a perde subsidio, e Centro di Bario Tanki Leendert a bay hopi atras.
Un di e prome cosnan cu tin cu haci, ta baha e dak di e centro y e cancha di futbol di sala, loke tabata genera e fondo pa e bario, for di 2011 ta afgekeurd. E centro no tin fondo ta drentando pa asina e sostene su mes.
Actividadnan
E lo cuminsa for di diabierna caba. Lo bay tin dos evento pareu. Lo bay tin riba careteranan di Aruba, na 9 punto strategico, lo tin miembro di diferente organisacionnan local, clubnan social, cu lo ta para cu buzonnan pa colecta fondo di comunidad.
Na e Centro lo bay tin un Happy Hour, for di 4’or di atardi te cu 10’or di anochi. Aki ta invita e bario completo, tur hende pa bin hunto. Lo tin presentacion di dos banda, cual ta Mystical Connection y Roots and Rhythm. Diadomingo lo bay tin e evento grandi cu ta bay bira e radio telethon, caminda cu for di 9’or di mainta te cu 9’or di anochi, ta invitando comunidad completo, comerciantenan, tur hende, pa bin aporta. Ta bay tin diferente bar y cushina. Lo bay tin presentacion riba escenario, lo bay tin zumba challenge, lo bay tin dumptank challenge. Tin diferente actividad na e Centro mes. Riba e dia aki lo bay tin tambe rond Aruba, na puntanan strategico un biaha mas, boluntarionan lo ta colectando pa yega na e meta inicial, pa cuminsa, cual ta 350 mil florin. Esey ta e meta pa por cuminsa baha e dak y drecha e veld. Logicamente despues tin mas fondo cu lo bin acerca.
Mester tin e contribucion prome pa por cuminsa. Esey ta loke ta rekeri na e momentonan aki.
Preparacion
E preparacion ta andando pa dos luna y mey, cu diferente partner, diferente organisacion social. Kiwanis Builders Club, diferente scol. Tambe ta bezig cu diferente team di scout y organisacionnan social cu ta yudando. A yega asina leu cu ta cla pa e evento wordo ehecuta e fin di siman aki y pesey a invita comunidad, comerciantenan pa acudi y coopera cu e centro di bario.
Diabierna y diadomingo
E fin di siman aki, dia 25 y 27 di Mei, lo ta mirando diferente boluntario na puntonan strategico y nan lo ta uniforma. Nan lo tin nan propio uniform cu nan badge y e buzon cu e sticker di Centro di Bario riba dje, indicando cu nan ta colectando pa e centro di bario. Ta invita tur hende pa bin diadomingo, cual lo bira e family day, cuminsando di 9’or di mainta, te cu 9’or di anochi. Lo bay tin un kidscorner, e speeltuin tambe lo ta habri. Despues di a haci limpiesa parti patras, e speeltuin ta hopi mas accesibel.
Ta bay tin e clubnan di Harley tambe cu lo bay ta dunando nan cooperacion, ofreciendo Harley Rides pa grandi y chikito y e dunktank challenge, cu hopi celebridad invita pa asina por bin sinta eynan mey ora y purba yega na un suma di 5000 florin y si no logra esaki, nan ta cay den e pool.
