Feria Betico Croes 2018 den e deporte di cabay

E dianan 20 y 21 di januari, esta diasabra y diadomingo awor, e Organisacion Caballista Arubano, OCA lo organisa nan Feria Betico Croes, celebrando asina Dia di Betico 2018.

E dos dianan di e feria aki lo wordo celebra den un localidad completamente diferente cu nos comunidad na custuma cune. E biaha aki OCA a dicidi di organisa su feria den Centro Deportivo Betico Croes na Sta Cruz. E diasabra 28 di januari lo tin e gran competencia pa cabay di tur modalidad, jinetes y amazonas principiante y dueños montados. Pa su diadomingo 21 di januari lo tin e competencia di youth horsemanship, jinetes y amazonas avanza cual puntuahe lo conta pa forma seleccion di mundial y mayor de 25 aña.

Mester bisa cu lo spera un participacion masal manera semper ta e caso den e competencianan di cabaya organisa pa OCA. Aña pasa den e competencia di Interpaso 2017, Aruba su representatenan a haci un tremendo papel logrando varios premio di honor entre e competidornan den nos region. Mas cu claro nos mihor jinete y amazonanan lo tey pa asina sigura un bon puesto riba e tabla di puntuahe pa loke ta e formacion di seleccion pa e proximo mundial na Ocala, Florida. Ta invita henter e pueblo di Aruba pa bin presencia un tremendo spectaculo di show di cabay den curazon di Sta Cruz esta na Centro Deportivo Betico Croes.

Un danki sigur na Lotto, e Loteria di Aruba pa medio di Comision di Subsidio cu a subsidia e eventonan deportivo en conexion cu e celebracion riba Dia di Betico. Tur aña mayoria federacion tin riba nan calendario un evento deportivo riba 25 di januari, celebrando asina e fecha natal di e gran estadistica Arubano.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.