Felipe Croes – E dolor innecesario cu MEP a causa nan famia

Pa medio di esaki mi persona Felipe Croes kier pidibo espacio den bo medio pa duna mi opinion y conta nos experiencia como famia/mayor over e caso dimi jiu Gerick Croes na 2016.

Como cuidadano mi tambe tin derecho di expresa mi mes y mi ta spera cu otronan por respeta esei. Na promer lugar mi kier duna di conoce cu ami ta considera mi mes un MEPista di cuna cual for di tempo cu Betico Croes a funda MEP mi a sigui e organisacion politico. Ora cu e partido a wordo funda e tawatin idealnan fuerte y den organisacion tawatin espacio pa tur hende briya y e oportunidad tawata wordo duna. Apesar cu Betico tawata esun di mas popular y e lider semper otronan riba lista bou su liderasgo por a sobresali.

Concientemente mi a laga tempo pasa promer mi duna nos opinion tocante caso y experiencia amargo cu nos como famia a biba aden. Mi jiu homber a wordo bon cria y forma door di su sra mama y mi persona.Nos tawata un famia humilde pero ehemplar cu a percura pa nan logra nan educacion. Tur loke nantin awe ta pasobra a logra esei cu nan estudio y sudor di nan propio frenta. Si un dia e tawata kier algo e sa cu e mester traha y spaar pe. Door di yena saco na supermarket e la spaar pa yega na su promer auto. Cu e norma y balornan  cu nos a lante nunca nan tawatin necesidad di touch cu nada di ningun hende. Asina e la crece y termina su estudio na un edad hopi jong. Gerick semper a gusta politica y tin hopi pashon y amor pa nos pais. Desde cu e la sacrifica su carera den mundo di accountancy/belasting pa subi lista di MEP ta decepcion so e la conoce. Un di e promer decepcion sufri ta ora e la haya un cobransa sorpresa di mas di 20 mil florin pa gastonan legal ora di bai corte na 2013 pa e motibo di a subi lista di MEP. Kizas hopi ciudadano lo pensa ta e mes a dicidi pa hasi esei pero hecho ta keda cu un organisacion politico cu lo ta interesa den un hoben no mag hunga cu su futuro. Mi jiu a laga sa e tempo ey como hoben profesional cu recien ta traha e ta imposibel pa paga gastonan legal di abogado si encaso tur cos mester bai leu. Aunke cu nada por escrito no tawatin, nan a bise no preocupa pasobra e lo haya su asistencia legal pa bringa su caso. Pero despues e la keda sin trabou y pa colmo haya uncobransa di 20 mil florin pa paga. E suma e mester a page for di loke e la haya di su likidacion. Mi ta laga na pueblo pa husga si ta normal pa hunga cu un hoben professional su futuro asina?

Nos como famia a biba cu a realidad aki y semper a kere den dje pa e demostra cu trabou duro cu e lo logra sobrepasa tur obstaculo. Gerick a keda entre oktober 2013 te cu februari 2014 desemplea y pa tristo cu esaki por sona partido MEP mes no a worry. Literalmente a lagele sclama tur e lunanan ey bibando bou situacionan economicamente hopi dificil. Esaki pueblo no sa , pa e mesun motibo aki e ta incomprendibel cu ta aplaudi e organisacion aki ciegamente. Loke si partido MEP a hasi pe na oktober 2013 ora cu su caso a sali positivo a saka un articulo den corant felicitando e pa gana su caso pero lo demas nada. Nan bida a sigui normal mientras mi jiu su bida a cambia y tawata struggle.Finalmente despues di a pasa den un seleccion di candidatonan cu a solicita pa bira fractiemedewerker di MEP e la wordo escogi. Nos famia tawata hopiagradicido pa e oportunidad cu mi jiu a haya. Pero lamentablemente e trato mes den MEP en general semper a laga di desea. Parlamentarionan hopibiaha tawata trate como sifuera ta mucha e ta, lubidando cu kizas e tin mesun of mas educacion y conocemento cu nan. Pero Gerick semper a mantene su mes humilde pero tambe expresando loke e no ta haya ta corecto. Kizas ora bo ta demasiado honesto esaki por conduci cu hendenan lo por marcabo.

Realidad cu ningun hende por nenga ta e hecho cu mi jiu homber durante e periodo como fractiemedewerker ta e unico persona banda di 2 parlamentario di MEP cu constant desde 2014 tawata hibando oposicion y traha duro. Apesar di tin poco recurso pueblo por a nota con Gerick a crece y tur ora ta capta atencion cu su articulonan bon balansa y critico manteniendo un linja di respet. Hasta compliment e tawata ricibi di contrincantenan cu a respete pa su forma di hiba politica. Ora ami tawata compañe den eventonan sociaal pueblo ta contento di mire. Den un periodo record e admiracion pe a crece substancialmente. Pero e mesun crecemento y admiracion di un pueblo pa Gerick a hasi’e bira un menasa grandi pa otro politiconan tradicional di MEP incluyendo e lider cu ainda ta usa sombra y memoria di Betico pa hasi politica. Pero MEP su actitud tawata uno hopidemotivante y destructivo pa e como hoben profesional. Na varioso ocashon mi jiu a wordo reclama pasobra e ta scirbi hopi articulo.

Tawata como sifuera e tawata limita di profila su mes. Mi ta content si di wak awor cosnan ta diferente pasobra ta temporada di eleccion. Manera mi a bisa anteriormente Gerick tin un estilo unico di comunica cu e pueblo y esaki a causa un clima di envida contra su persona den e mesun organisacion cu e tawata traha duro den dje. Gerick nunca a drumi, nunca a descansa y simper despues di eleccion 2013 e la keda activo. Nos como famia tawata asombra cu for di e propio lider tawata sali expressionan cu e no por profila su mes mas cu e lider pasobra hende ta comenta esei. Otro parlamentario femenino tawata hasi como sifuera e topico financiero ta e so mag di papia, scirbi of comenta di nan. E impreshon ey sigur ta demotivante pa un hoben pasobra bo ta desencurashe y no ta duna espacio pa e sigui crece. Ta como sifuera si bo ta parlamentario so bo mag scirbi. Esaki ta un trato denigrante y na e mesun momento hopi negativo pa un organisacion politico cu kier purba haya otro grupo di sostenedornan pa e por crece. Parlamentarionan inclusivo lider tawata balote y purba na sabotea e como politico prometedor y un di esnan cu lo a bira hopi grandi 2017. Personalmente nunca min pensa cu den partido di Betico asina hopi persona falso y envidioso ta forma parti di dje y cumi jiu por tawata rond di hendenan asina.

Gerick dedicando su mes 100% na politica  (pasobra carera den sector priva e no tawatin mas) a demostra kiko un persona apesar cu no ta den parlamento y no ta bini di famianan cu descendencia politico (of privilegia) por hasi ora bo tin pashon y amor pa politica. E la cuminsa ta hasi fundraising hopi trempan pero pa hasta esei mi jiu a wordo obstaculisa y critica. Mi jiu homber a wordo reclama y critica pasobra e ta usa logo di MEP , a critike pasobra partido tin preferencia.Tawata parce su man tawata mara! Si bo ta un candidato di nan ta cual logo bo por usa anto? Esaki ta lamentabel pasobra partido MEP pa hopi tempo ta inactivo ( te awor na 2017 ta agresivo) y pa delaster un pretexto nan tawata purba di strobe. Nan a bai asina leu di strobe hasi un evento di christmas baskets pa esnan menos afortuna (cual mi jiu hunto cu su mama pa algun aña caba ta hasiendo esaki for di propio iniciativa promer cu 2013). Esaki ta nifica cu e no mester a bira un politico pa por cuminsa yuda comunidad. Mi jiu pa por a yega na fondo ta bende cuminda pa despues e mes bai cumpra comestibles pa traha e paketenan. Na varios ocashon e la wordo reclama bou nomber di directiva cu Gerick no por hasi fundraising siendo cu ta trata di un acto di caridad. Tur manera a stroba un hoben di traha su caminda. Tristo ta e propio lider no tawata apoya e personanan riba lista cu tawata cune cu ta traha duro pa e partido. Ta hopi tempo valioso dimi jiu a wordo sacrifica di su 2 babynan y duna na MEP pasobra otro candidatonan di MEP tawata floho y no ta duna din an banda. E berdad curu y cultura di candidatonan di MEP ta bai eleccion pa despues drenta un winterslaap y lanta bek 6 luna prome cu eleccion. Cu Gerick bo por a nota e spirito bibo di un hoben cu ta traha duro. E realidad tawata cu aunke Gerick tawata den oposicion e la profila su mes naun forma diferente compara cu e lider di MEP y cualkier otro candidato. Door di esei e la haya admiracion di hopi hasta di propio contrincantenan manera mi a indica caba. Pero ki otro por a spera di e trato na su persona si hopi den pueblo mes den mayoria no gusta e lider ni varios di e parlamentarionan pa e forma con nan a sinta hiba politica?

Den pueblo y den seno di propio partido MEP e opinionan tocante mi jiu tawata cu e lo crece enorme y miembronan di MEP y parlamentarionan no tawata gusta esei.  Mi jiu semper tin un reputacion impecabel . Mi ta haya lastima cu envidia, jaloerzie y e ego di esnan mas ariba di e lista hasta e lider a hiba na purba DESTRUI bida dimi jiu y lubida cu e tin 2 baby! E partido a hasi e acto mas baho y vil den historia di politica na Aruba contra un hoben. Unpersona manera e lider cu ta expresa cu nos hobennan merece mihor tras di cortina (crioyamente bisa tira piedra sconde man) a hiba un campaña di susha nomber di un persona ehemplar manera mi jiu Gerick Croes. Un partido cu idealnan social democrata hamas y nunca lo mester a actua di tal indole. Nan a lubida cu Gerick tambe tin famia y cu su mama ta patient di curason. Asina algun di nos tambe e atake aki a afecta nos emocionalmente pasobra di ningun manera bo ta trata un hoben na un forma asina cruel peor cu enganjo, hechonan eroneo, historia crea y crea percepcion falso!

Como Mepista mi ta sumamente decepciona den e lider actual di MEP  y pa duele cu e ta hasi mi curason nos a bandona fila di MEP, mesun peticion nos a hasi na tur familiar, amigonan y tur otro amistad. E principio di trata un persona manera un berdadero ser humano y pone e hende central ta di hopi peso kinan. Purba di laga un persona sin nomber, sin carera, bati’e cu sushedad pa caba cune djis pasobra bo tin miedo di dje como politico ta algo cu hustamente ta demostra e tipo di personanan tras di e organisacion politico aki. Lastimamente mi no ta reconoce MEP mas cuBetico su idealnan!

Despues di 45 aña nos ta abandona MEP cu sabor amargo. E motibo principal ta cu mester trata e ser humano na un forma bon y no purba mata su caracter pa abo so por keda bon mira. E opinion eyfor di varios mepista raha y pueblo en general ta cu Sra. Evelyn Wever-Croes su presencia ta cabando cu MEP y esaki ta obvio desde cu un cantidad di politico grandi manera sra. Marisol, sra.Mervin, sr. Candelario y sr. Carl a bandona MEP. E caso dimi jiu no ta diferente pasobra e partido ta mandando un mensahe na pueblo eyfor cu den MEP no tin espacio pa otro si bo no ta parlamentario, cu den MEP no tin lugar pa hobennan cu ta resalta y cu lo por surpasa cierto hendenan den partido pasobra nan tin capacidad y mas sentimento humano. Dibiaha MEP wak nan sobresali den pueblo nan ta cla para pa corta nan hala. Si e tawata un lider di nivel, integro y transparente e lo a hasi lo corecto ora cu hende cu ta wak! Lo a la laga hasi uninvestigacion completamente imparcial entre otro saka videonan di banco pero esaki lo no a cumbinie pasobra NUNCA e lo no tin nada pa mustra contra mi jiu (y nunca lo tin tampoco). Sra. Wever- Croes semper ta papia di integridad ” hasi loke ta corecto, hasta ora nan no ta mirabo”. Awe mi ta kere cu e mester tin hopi berguensa di a expresa e palabranan aki si e mes no ta duna contenido na esaki den su propio seno. Un lider real lo a maneha un problema asina manera adulto sabiendo cu ta trata di un ser keri cu a comete e eror y no mi jiu y hasi lo corecto cu un nivel di imparcialidad. Tira piedra sconde man ta un arte cu e lider actual di MEP a domina hopi bon y a lage score riba un hoben prominente. Bo no por ganja hunga bon samaritano door di laga y despensa e persona cu realmente a comete un acto contra ley liber y hunga cu sentimento di hende pasobra nan tin jiu pa despues bo directamente of indirectamente laga cada un miembro di bo organisacion politico bai den pueblo y asesina character/personalidad di Gerick Croes. Y esaki pueblo a ignora y no a ripara e plan di accion obvio pa purba na caba cu un hoben cu tawata sobresali entrenan. Algun persona a prefera para banda un organisacion politico cu a demostra su berdadero cara humano pa destrui OTRO cu no ta cu nan mas. Loke mas a decepcionami ta cu e lider ta un mama di 3 jiu, un wela y lider di un partido social democrata cu door di tira piedra y sconde man a castiga un hoben cumi 2 nietonanliteralmente por nada. Hecho ta cu full e organisacion di e forma mas cruel a purba lage sin nada! Ta wordo papia den pueblo cu e hasta e rifa di Disney World organisa pa Gerick mes tawata asina impactante cu a crea jaloerzie bou di lider y otro dirigentenan di MEP anto pesei tanto sabotahe. Hasta e rifa ey e lider kier a ranca for di dje. E ta di lamenta pasobra den MEP mes tur e tempo nunca tawatin nada diferente pasobra nan no tin creatividad pero ora un hoben bin cu algo NOBO full e lista ta envidie y codicie.

Como tata di Gerick loke mas mi ta condena di e organisacion di MEP ta cu nan campaña di difamacion a bai asina leu pa touch cu su nivel di estudio purbando di destrui su carera. E parti mas lamentabel y condenabel ta e hecho cu e cabesante sa cu nunca Gerick a yega di hasi algo y hasta e la senjala den corte cu kizas por ta un caso unda cu por tawata mas atento. Cu ta un ser keri ta esun cu a comete eror ta un hecho. Asina mes no mester lubida cu nos como ser humano no ta perfecto. Mi no ta hustifica tampoco cu tal acto lo a sosode,pasobra esaki no ta bon. Pero pa bai asina leu pa crea un percepcion di e eror cometi door di otro persona y hasi como sifuera ta Gerick a hasi tal ta e nivel di mas abou cu por a bai den historia di politica na Aruba. Riba lista di MEP tawatinpoliticonan cu a hit and run, cu antes tawata envolvi cu traficacion, politiconan sentencia pa actua contra ley di comptabilidad y net eseinan e lider a keda cu nan. Como tata y un persona cu ta sigui politica di serca mi ta compronde cu cierto cosnan berdad ta politica pero den e caso specifico aki di mi jiu nos ta papiando di maldad. Cualkier persona na su sano huicio por pensa cu loke a wordo hasi no ta normal y inhumano den tur aspecto! Cu e organisacion di MEP deliberadamente a crea unpercepcion mey mey di pueblo di culpabilidad siendo nan ta na altura cu ta un ser keri tawata envolvi y toch ta sigui riba e mesun cos pa kibra un hoben educa y prometedor ta un actitud di condena.

Den bijbel ta para cu esnan cu hasi maldad un dia lo wordo condena y esei ta conta tambe pa lidernan di organisacion politico manera MEP cu tin su existencia conta si liderasgo no cambia. Dios ta bisti pijama pero no ta drumi. Si despues resulta cu pa via di mi opinion hendenan kier atakami ta algo cu mi no ta descarta y tampoco lo sorprendemi mas di hendenan di MEP cual tambe ta algo cu nan mester cambia sino e lo bai causa nan autodestruccion. E pensamento cu djis paso bo opinion no ta mucho positivo pa e partido y despues wordo jama pa tur tipo di cos mes ta caba cu partido.

E propio MEPistanan mes ta yuda core cu hende! Hasta e hecho cu candidatonan cu no ta forma parti mas di MEP cu ta wordo lastra ta incomprendibel pasobra ta come lubida con e mesun candidatonan ey a sacrifica nan bida , tempo y famia pe e organisacion. Pami e ta un actitud hopi malagradecido. Mi no ta descarta tampoco comotata cu den futuro lo tin e posibilidad cu persecushon politico por tuma lugar sea cu mi jiu of nos como su famia.

Mi ta contento y orguyoso cu mi jiu homber apesar di tur cos emocionalmente y spiritualmente a demostra di ta un hoben fuerte. Gerick a wordo husga, condena, lastra y tilda pa hopi hende sin misericordia. Un criminal mes ta haya su second chance den bida despues di a comete un crimen. Imaginabo un persona cu literalmente nunca a hasi nada pero toch a carga e peso di sushedad politico sin tin mester. Nos famia ta compronde cu e wega aki a wordo hopi bon hunga y tapa cu ayudo di media. E la wanta asina hopi sushedad y ainda tin e motivacion pa sigui bai dilanti despues di un sla innecesario y trato inhumano. Hopi lo kier nenga y trata di defende ciegamente e organisacion politico y su lider, pero prome bo atakami no lubida cu ami ta mep mescos cubo pero e diferencia ta cu AMI no ta tolera abuso y inhusticia contra di e ser humano. Mi a vota pa MEP ora Betico Croes (qepd) tawata na mando. Mi a asisti na tur manifestacion y hasta esun di Augustus scur 1977.  Despues semper mi a keda vota pa sr. Nelson Oduber. Ultimo mi a vota pami jiu y esnan den mi famia cu nunca antes a sosteneMEP tambe a duna Gerick nan voto pa e simpel hecho cu nan sa con e la wordo lanta, con hopi e la studia y ta un hende di bon boluntad. Danki Dios cu awendia e tin esnan cu ta sigui stime y a encurashe pe sigui studia. Promer cu e listanan pa eleccion 2017 a wordo sera ta 3 diferente lider a aserke pa subi lista pasobranan nan ta kere den su integridad, profesionalismo, su potencial y amor pa nos pais. E tin asina hopi potencial cu e propio Minister Presidente Eman a expresa su admiracion pe y ta wak e spirit di lider den dje pa futuro.

Pa esnan cu ta puntra unda e ta awor? Mi jiu homber a dicidi di cuminsa di nobo y re-educa su mes como hoben professional. Danki natodopoderoso cu tur cos ta bayendo bon cune y a topa hende nobo den su circulo y mi ta spera cu un dia e por tuma e decision pa bolbe drenta e arena politico bek pasobra e pueblo di Aruba mester hende educa y cu curason humilde manera dimi jiu.Aunke e como hoben ta pensa otro awor di politica debi na e sushedad cu politiconan tradicional ta hiba y kizas esaki por ta un factor pa no regresa. Mi ta termina gradiciendo cada un persona cu a lesa esaki y gradiciendo tambe tur hende cu a apoya mi jiu homber desde su lansamento na Savaneta como politico na 2013. Como cuidadano mi tin e derecho di por expresa mi mes sin cu lo mi bai wordo persigui. Mi ta spera tambe cu esnan cu ta sostene mep por respeta opinion di otro y no atakanan paso simplemente nan no ta forma parti dibo organisacion mas. Ta tristo cu tur e personan aki ta lubida cu undia esnan cu no tey cu nan mas a traha duro un tempo pa yudanan bai dilanti. Esaki tawata loke nos como famia a biba y a experiencia. Kizas e ta un les tambe pami propio jiu pa e wak bon kende ta rond di dje. Mi ta sera e capitulo scur aki cu e mensahe: ‘Trata un otro manera abo ta spera di wordo trata!’