Recientemente hopi a cuestiona si ta inverti suficiente den deporte. Mientras cu hobennan ta cana pidi contribucion riba caya pa biaha, e situacion aki a lanta e impresion cu no tin placa pa deporte. Ministerio di Deporte conhuntamente cu Fundacion Lotto pa Deporte tabata inverti anualmente 3.5 miyon.
Minister di Salud Publico, Cuido di Nos Grandinan y Deporte, Dr. Carlos “Alex” Schwengle a traha duro durante mas cu 2 aña, riba un maneho transparente y sostenibel negociando cu CBN (Canadian Bank of Novoscotia) y e aña aki a logra aumenta e suma na 4.5miyon. Asina aki Fundacion Lotto pa Deporte por inverti den e federacionnan local. Cu esaki ta bin cu algun regla esaki ta mas cu logico. E tempo di regala placa sin cu federacionnan ta duna cuenta na unda e placa ta bay y con nan ta gasta esaki a pasa pa pasado. Comision di Subsidio a informa tur e federacionnan debidamente di locual nan mester cumpli cune pa yega na remarka pa haya subsidio. Ora cu a repasa e reglamento di Comision di Subsidio por a nota cu un di e exigencianan ta tambe cu un federacion mester pone tur miembro na altura di cuanto placa a ricibi di Comision di Subsidio y cu mester cumpli cu por lo menos un reunion general pa aña.
Hopi biaha no ta cumpli cu e exigencia aki. Algun di e puntonan ta como lo siguiente:
E federacion mester manda su administracion, statement di banco y otro documento rekeri pa
Ernst & Young via Comision di Subsidio pa haya e relato financiero (jaarrekening);
Un cuenta na banco bou nomber di e federacion of organisacion;
Organisa y tene por lo menos un reunion General pa aña y tene reunionnan di directiva
frecuentemente;
Comision lo manda Minister di Deporte y SFLpD periodicamente un resumen di subsidio otorga na e federacionnan/organisacionnan.
Mester bisa cu tin un grupo representativo di e 39 federacionnan existente cu si ta cumpli cu tur articulo y ta un ehempel sigur pa otro federacionnan. Por remarca cu federacionnan entre otro manera di Domino; Dammen; Cricket; Gymnastico; Cabayista; Lawn tennis; Tennis; Futbol; Volleyball; Weightlifting; Schaken y Wielerbond ta cumpli cu tur rekisito ora cu tene na cuenta maneho di e federacion. Nan ta cumpli cu relato financiero, a entrega nan calendario di 2017, a reuni cu miembronan y tin un directiva activo.
A entrega notula nan di reunion general di miembronan, ta up to date cu pago di miembrecia na ASU cu ta un suma modesto di Afls75,= pa aña. Comision di Subsidio sigur ta observa federacionnan asina cu tur cos na ordo como ehemplar. E otro gastonan subsidiabel ta entre otro organisacion di kamp pa entrena pa competencianan local y internacional y miembrecia na federacionnan internacional. Tambe ta subsidia cursonan local y ta cubri gastonan pa preparacion di seleccion nacional; coach local of internacional y campeonatonan local y of internacional na Aruba. Tur regla cu e federacion/organisacion mester di dje ta poni den diferente articulo y e federacionnan ta haya nan. Tur e reglanan aki t’ey pa asina tur por traha riba e mesun nivel pa ora di pidi un subsidio. Aki ta algun art. cu ta sumamente importante pe federacionnan corda riba nan na momento di pidi subsidio:
Art. 18 Mester entrega e siguiente documentonan hunto cu e peticionnan:
Un relato financiero acorda di e aña anterior;
Un calendario di actividad di aña 2016;
Un lista di miembro di directiva y nan funcionnan;
Un lista di miembro di e federacion actual;
Un declaracion por escrito cu nomber completo di instancianan local of internacional for di
kende e federacion ta ricibi ayudo, sea den forma di placa of di material y pa cual evento ta uza
esaki. Ayudo di ASU y COA no mester ta menciona;
Un copia di e ultimo version di statutonan aproba. (No ta necesario si Comision tin e caba);
Un relato di actividad di e aña anterior (relato di secretaria);
Prueba di pago di miembresia di ASU;
Notulanan di e reunion General (ALV);
Federacion mester entrega nombernan di atletanan den seleccion y preseleccion, hunto cu e
plan di entrenamento. E peticionnan hunto cu tur documento pidi den art. 18 mester ta entrega no mas tarda cu dia e dia stipula pa Comision di Subsidio na e secretariado na C.D. Guillermo P. Trinidad. Miembronan di Comision di Subsidio lo trata e peticion na momento cu tur documento keda entrega. Pues si falta documento No ta trata e peticion. Por cancela of cambia e peticion si sali na cla cu e federacion no a duna e informacion corecto of completo na momento di entrega e peticion. Si e Comision honra e peticion cu un suma di mas cu 2500 florin, lo duna 50% di e suma como adelanto (voorschot) pa ehecucion di e evento. Despues di entrega e relato financiero y relato d evento lo ricibi e restante si prueba cu ta subsidiabel. Tambe tin un seccion cu ta indica kico tur por duna subsidio pe gastonan
subsidiabel. E rubricanan cu por ricibi ta curso, preparacion di seleccion nacional, coach di seleccion (internacional y local), campeonato nacional, campeonato internacional den exterior bou auspicio di e Federacion Internacional y congreso y seminario (local y internacional). Tur ta reglamentonan cu federacionnan/organisacionnan mester sigui pa asina nan por ricibi subsidio. Gobierno a percura pa deporte haya mas placa pero na mes momento ta stimula e federacionnan pa genera fondonan dor di organisa eventonan y actividadnan deportivo. Gobierno ta pone di su parti y aplaudi e federacionnan cu ta cumpli cu regla y tin tur cos up to date.
