Famianan ta pidi claridad den morto di anciano na Aruba

Siman pasa dialuna, algun trahado di Aruba Aloe a haya un persona di edad morto. Autoridad a wordo yama pa bin na e sitio y dr. Texeir a constata morto natural di e cabayero, kende lo tabata tin 83 aña di edad. Ta trata aki di Jose Sepulveda, kende ta un Colombiano for di Cartagena. No a haya ningun señal di maltrato riba e persona y e caso a wordo cera.
Pero famianan no ta di acuerdo cu e teoria aki y ta pidi claridad, pasobra segun nan, nan ser stima a wordo mata.
Segun Caracol Radio, ya for di dia 31 di Januari, Jose Sepulveda a biahap a Aruba, caminda cu riba e fecha di 12 di Februari, a wordo haya morto y dera riba e isla e dia siguiente, sin consulta cu su famia residente den su totalidad na Colombia.
Ibis Villa, nieta di e fayecido, a conta Caracol Radio cu Jose del Carmen a biba durante 35 aña riba e isla. “Mi welo ya pa hopi tempo tabata traha den un empresa cu tabata transporta Whiskey, eynan el a baha cu pensioen y despues di esey, carga cu un enfermedad cu no tabata lag’e cana bon, a dicidi por fin bay bek na su pais,” Villa ta conta.
Sin embargo despues di un tempo na Cartagena, segun e anciano, a cuminsa tin problema pa haya su pensioen, unda cu na November, el a biaha pa Aruba ya bay bek Cartagena na December. “Nunca el a acepta ayudo, el a duna nos e number di telefon di e supuesto abogado na Aruba y e tabata yama nos via WhatsApp via telefon di un amigo di cual nos no sa su nomber. El a bisa nos cu e tabata keda na cas di e meneer eynan,” Ibis a relata.
Jose del Carmen semper tabata hopi reserva, nunca a acepta cu su famia a bay bishit’e na Aruba y nunca nan tabata tin relacion directo cu un hende cu tabata conoce Jose riba e isla. “E comunicacion telefonico eynan tabata e unico cu nos tabata sa di su bida na Aruba. Dia 31 di Januari, el a bolbe biaha y nos a preocupa, ora cu ya tabata dia 3 di Februari y e no a reporta,” su nieta a conta. Ibis ta sigui bisa cu e tabata manda mensahe na e number di e amigo di Jose y e abogado, pero nunca a haya respuesta. Asina a pasa varios dia unda cu incluso e amigo di Jose del Camber, a blokia algun miembro di e famia na Colombia. Tur cos a transcuri den suspenso, te cu dia 12 di Februari, autoridadnan di Aruba a avisa di e morto di Jose.
“Nan a haya mi welo den un zona rocoso, leu di algun vivienda. Mi ta kere cu ta un crimen, pasobra mi welo no por a cana bon, un hende mester haci’e daño. Nos a cuminsa e proceso cu e Ministerio di Relacionnan Exterior y nan a bisa nos cu e consul lo bay tuma encargo. E dos personanan aki cu nos sa cu a wak mi welo cu bida, ta dedica na bisa nos cu ya e consulado nan sa, pero e cos aki ta hopi straño,” Ibis a sigura.
E famia tambe a pidi e repatriacion di Jose, ya cu “di manera tambe hopi straño, nan a dicidi pa der’e eynan, pasobra ya e tabata den un estado avansa di descomposicion.
Nos ta kere cu e tabata un asesinato y nos ta pidi autoridadnan Colombiano pa pone tur presion riba e caso pa resolve kende a mata mi welo,” Ibis a finalisa.