Fundacion Lisette Gomes a tene un rueda di prensa hunto cu famia di e dos muchanan Rishandroh y Eugene, caminda cu un di su miembronan, Xiomara Bislik a trece algun informacion riba e caso Speeltuin, cual lo tuma luga diabierna awo den corte. E meta ta pa recorda pueblo riba e caso aki, un caso cu no tabata tin mag di a tuma luga nunca, di cual ta spera cu morto di Eugene y Rishandroh no tabata en bano y cu esaki nunca mas lo pasa, di cual ta spera di mira cambio tambe pa proteccion di nos muchanan pa e caso lamentabel aki hamas tuma luga.
Ta pidi hues pa e pena maximo pa e dos personanan aki.
Famia di e muchanan
Marie Anastacia y e ta e tanta di Rishandroh y Eugene. E famianan tabata tey na e rueda di prenda pa recorda pueblo di Aruba pa husticia. Tur loke nan ta buscando husticia y ta pidi pa haci un yamada na hues pa tuma e decision corecto, unda cu tur hende por keda satisfecho cu e castigo cu hues lo bay impone, pa e dos hendenan cu a kita e bida di Rishandroh y Eugene. E tata di e muchanan no tabata tey presente mirando cu e no ta sinti su mes bon cu e situacion.
Unda e famia tabata
Tin varios biaha Marie tabata busca e muchanan cerca nan wela y e mama semper a nenga pa e tata wak e muchanan. E ruman homber tampoco nunca a bisa cu el a wordo menasa pa e pareha di e mama, kende ta Gabriel. E muchanan, hopi biaha di berdad, ora di hiba nan cas bek cerca nan mama, nan nunca tabata kier bay. Semper a pensa cu tabata normal cu for di chikito nan no kier a bay. Pero nunca no por a pensa cu algo grave asina tabata pasando. Tambe segun e tanta, tin hopi hende cu ta papiando cosnan cu no ta corecto, of cu nan no sa. Nan ta comentando cosnan cu di berdad cu no tin sentido. Pero no por huszga ningun hende. Marie no ta bezig ta huzgando ningun hende, pero e ta papia pa su mes y loke a biba cu e muchanan.
Segun e tanta, mescos cu e famianan di e mama, e dos famianan, tanto di e tata omo e mama, tabata super uni. Tabata un momento bon. Marie no tin ningun rabia contra ningun hende. Pero ora cu ta dia di huicio, Marie a sinti cu tin poco falsedad. E ta compronde, cu e mama ta nan famia y dimes nan ta bay tuma parti p’e. Pero mescos cu nan ta bay para testigo pa Gabriel por paga su castigo di loke el a haci pa e mama, ta spera cu nan por habri nan boca y papia loke e mama tabata haci, no tabata corecto. Si di berdad nan tabata stima e muchanan, ta depende di nan pa papia e berdad y con cos tabata, con e trato tabata cu e muchanan. No haci cu awor cos a pasa, kier defende e mama. Risheila, e mama, tabata haya bati, pero pa hues tuma esey y baha e añanan di e mama, pasobra miedo no por bisa cu e no tabata tin pa papia. E tabata tin chens pa bisa cu e cos tabata sosodiendo.
Marie a wak cu Risheila, dos dia prome cu Rishandroh a bay hospital, para na su trabao, a acerk’e y bis’e cu e lo bay busca e muchanan. E ruman muhe a keda di yuda pa kita e muchanan for di Sheila. Sheila a bisa cu no, pasobra el a gana un weekend stay y e muchanan ta bay keda cun’e den hotel, cual ta riba dialuna. Riba diaranson, mama di Sheila a yama Marie bisando cu Rishandroh ta den coma na hospital.
Kiermen, miedo no por tabata tin eynan, pasobra si tabata tin miedo, Rishandroh lo tabata na bida ainda. Por a papia cu Marie, y sikiera e lo por a scapa Shandroh. Y nunca el a haci esey, pasobra e no tabata tin e interes pa scapa Rishandroh tampoco. Nan ta bisa cu el a papia, el a hiba Shandroh hospital, ta pasobra e kier a scap’e. E kier a scapa su mes y esey ta un gran berdad cu tur sa. Tur hende sa cu e kier a scapa su mes. Pesey el a hiba e mucha hospital pa polis por a cay aden, pa e no bira e di tres. Y ta hopi cos cu ta pasando, cu ta papiando. Pero ningun hende no sa e dolor cu e famianan di e tata di e muchanan cu nan ta sufriendo tur dia. Nan ta haya nan falta. Ora cu e subrinonan ta hunga cu yiunan di Marie, ningun hende no tabata sa e dolor di berdad. Ta un dolor cu hamas y nunca lo bay caba pa famia Anastacia.
Mensahe
Un conseho pa famianan cu ta pasando den algo asina, cuminsando na Voogdijraad, pa nan cuminsa tuma e decisionnan corecto. No ta pasobra ta un mama, e yiunan por ta safe cun’e. E yiunan tambe por ta safe cu nan tata. Ta pidi pa cualkier hende cu a mira algo of scucha algo, y no ta pasobra no ta bo famia, no ta bay geef door pa preveni loke a pasa cu nan ser keri, sosode cu otro mucha. Kico por scucha of mira, geef door. No mester tin miedo. Si no kier duna nomber, ta ok, pero ta spera cu Voogdijraad haci su trabao manera debe ser. A lucha bastante y no a bay door.
Unico cos cu por sigui haci ta sigui entrega keho y si no wordo scucha, Marie ta conseha pa bay prensa y indica cu a sigui e pasonan di entrega keho. Asina nan lo cuminsa move y haci cosnan manera debe ser.
Si un hende sa cu nan a entrega un keho y bo tin prueba di esey y a tuma nomber na ken a entrega e keho y no a haci ningun movecion, a laga e cos para y bay prensa, publik’e. No ta perhudica ningun hende. Bo ta bezig ta salbando un bida. Esey ta loke ta bezig ta haci. Marie ta haya cu esey ta e miho cos cu bo haci. For di ora bo bay prensa, nan ta tuma accion.
