Durante un conferencia di prensa diahuebs atardi, Jonathan Trinidad y Vanessa Almarante di e organisacion Famia Planea a papia un poco di e trabou cu e organisacion a haci den 2017 y nan plannan pa 2018. Na mesun momento a anuncia lansamento di nan campaña nobo “Ami ta dicidi”.
Almarante a expresa cu nan ta hopi contento cu resultado di trabou di e organisacion aki specialmente bou di hobennan.
Ela splica cu a base di e trabou cu Famia Planea a bin ta haciendo, por mira un mehoracion den e cifranan di e.o embarazo hubenil. Nan a haci un evaluacion di e Age Statistic Fertility Rate,, basa riba cifranan cu Oficina Central di Estadistica tin disponibel.
A haci uzo di cifranan di 2008 te na 2018. A haci e evaluacion den e categoria di mucha muhenan di 9 pa 19 aña y por a constata cu esaki den transcurso di añanana baha di 44 pa 24%. E ta kere cu e campaña di 5 aña di I love my Body combina cu charlanan a hunga un influencia positivo, entre otro dunando hobennan materialnan anticonceptivo.
Jonathan Trinidad a bisa cu e cantidad di bishitanan cu nan ta haya di hoben y adulto ta sigui crece, tumando e decision pa cuminsa un producto anticonceptivo. Nan a constata cu e bishitantenan ta subi pa aña cu 10 porciento. No solamente e clientela a crece, pero tambe e charla y tayernan cu Famia Planea ta duna na e diferente scolnan na Aruba.
E charlanan di scol ta subi tur aña entre 8 pa 10%, mustrando cu cada bes mas scol ta habri pa duna su studiantenan mas informacion riba educacion sexual y cambio di curpa. Pa esaki ta masha agradecido na tur e scolnan cu a coopera cu e trabou di Famia Planea a crece. El a splica tambe cu e charla cu ta wordo duna ta wordo haci basa riba e grupo na cual e informacion ta dirigi. Tur hende mester ta consciente cu e muchanan y hubentud ta den desaroyo constante, nan ta crece fisicamente pero tambe nan ta crece riba aspecto social y emocional. Nan ta bira hoben pa despues bira adulto.
Door di e crecemento aki, ta trata di traha den un forma hopi mas innovativo, haciendo e charlanan hopi educativo y interactivo, pero tambe atractivo pa e hobennan, aportando na crecemento y desaroyo di cada mucha den e comunidad.
E campaña I Love My Body cu tabatin un duracion, tabata hopi exitoso bou di e grupo di hobennan pa nan ta mas consciente di nan curpa. “Nos por a mira su frutonan y e cifranan cu nos a trece awe dilanti ta bisa cu nos mester sigui inverti den campañanan di conscientisacion, tayernan inovativo pa e diferente tipo di scolnan. A termino largo nos ta wak e fruto di inverti den un campaña manera I Love My Body.” El a enfoca riba cambio di comportacion y motiva e muchanan pa stima nan mes y protege nan curpa. Despues di evaluacion di e exito, a dicidi pa introduci “Ami ta dicidi”. E ta dirigi y hiba e mensahe pa e hobennan pa ta consciente y motiva pa tuma decisionnan responsbel pa cu nan bida. E no ta purba no solamente pa yega cerca muchanan pero tambe na hoben y adultonan. Pa nan tuma decisionnan importante pa na crecemento y bida pa logra nan metanan den bida. No solamente e ta pa conscientisa nan riba e importacion di tuma decisionnan responsabel pero tambe ta cumpli cu e metanan mundial di desaroyo sostenibel. Ta contribui di e forma aki na un Aruba mas consciente.
