Famia na Aruba y Venezuela ta desespera buscando drechi di nan ser keri cu ta perdi desde diabierna. Den e caso aki famia Ramirez kier sa unda nan dos familiarnan ta despues cu obligatoriamente autoridadnan di waf na Aruba a exigi pa nan bandona nos isla cu e boto “Canerey”.
Algo a bay robes
Nan a bin dos hende den boto for di Venezuela. Ta trata di Jonathan y Junior Ramirez. Nan a bin Aruba cu e boto pasobra el a wordo cumpra na Venezuela for di un hende di Aruba. Na Aruba tur cos tabata regla legalmente y tin hasta documento di abogado. Diabierna nan a yega mainta y aparentemente ASTEC no kier a ricibi e boto. Prome cu nan a haya chens di atende e situacion, a obliga nan bandona waf di Barcadera.
Parce cu nan a klaar in corectamente na nan yegada. Tanto e parti di imigracion y Douane a cana nechi. Tabata intencion di trece e boto, keda drumi na Aruba y sali cu avion. Ta wordo menciona despues cu e documentonan di e boto toch no tabata corecto pa un salida legal for di Venezuela. Pesey a nenga nan entrada.
Kustwacht di Aruba a compaña e boto “Canerey” cu e dos tripulantenan te den awa teritorial Venezolano y djey Guarda Costa Venezolano di Tucacas a tuma over. Di eynan no a tende nada mas di boto y tampoco di e dos tripulantenan.
Famia a bay na Tucacas na e post di Guarda Costa y ningun hende sa di nan paradero. Tampoco a tende unda e boto ta. E dos tripulantenan ta yiu di capitan di e barco di fruta Gaviota cu tin añanan ta bin Aruba.
Mirando cu a entrega nan na autoridad di Venezuela riba lama, kizas Kustwacht di Aruba tambe por duna un splicacion kico ta pasando y tuma contacto cu nan coleganan di Venezuela pa puntra di nan paradero.
Famia ta haya hopi straño pasobra desde diabierna no a tende nada mas di e dos tripulantenan. Lo keda pendiente pasobra pa famia sigur esaki ta preocupante.
