Exprodesk ta na beneficio di nos artistanan

Directie Economische Zaken a bin cu un otro tema interesante pa loke ta Exprodesk. Sharon Meijer ta Policy Advisor na Directie Economische Zaken y su unit Exprodesk y ta splica cu Exprodesk tin dos proyecto grandi. Un di nan ta e industria creativo y e  otro proyecto ta di e sectornan di servicio.
E tayer di Diaranzon tabata den cuadro di e industria creativo. A cuminsa di aña pasa na October cu diferente tayer pa nos musiconan, productornan y compositornan.

Awor aki, den e mesun cuadro aki, tin e topico di derecho di autor. Pero manera ta conosi, den e ultimo dianan aki tin e topico cu ta hopi comenta y cu tin hopi pregunta, cual ta royalties. Door cu esaki ta e topico actual, a brinda e oportunidad pa tur persona cu tin pregunta of kier sa mas riba derecho di autor y regalia/royalties, pa por a participa na e tayer aki.
Lo sigui diahuebs, dia 22 di Maart, riba derecho di autor den combinacion cu Raise your Digital IQ, cu ta tur loke ta encera strategia digital. Por ehempel tin hopi di nos artistanan cu tin creacion, pero no sa bon con pa crea trafico online, of kico ta un bon uzo di social media. Pesey mañan diahuebs BIE (Bureau Intelectuele Eigendom) lo bay duna e tayer aki pa otorga mas informacion riba derecho di autor y Defiant Concepts lo duna e tayer riba strategianan digital.

Presentacionnan

Esakinan ta temanan di interes. Segun Meijer, door cu Exprodesk ta un export promotion desk pa nos artistanan por exporta nan creaccionnan, nan mester sa nan derecho como autor pa proteha nan obra. Den e ambito aki, pa proteha nan creacion, pa proteha nan cancionnan, nan arte, ta bin cu diferente tayernan. Den e tayernan tambe tin ora ta bin otro necesidadnan dilanti. Akinan ta percura pa bin cu tur e diferente topiconan, cual ta topiconan actual, manera Royalties. Ta bay tin mas tayer tambe na April, pesey ta pidi pa keda pendiente, pasobra lo bay tin tambe difernete tayernan pa e indistria creativo y tambe pa e sectornan di servicio na Aruba. Hopi hende no sa cu nan tambe por exporta nan servicio. Pesey keda pendiente, tin diferente tayer na caminda.

Exprodesk ta un unit nobo di Directie Economische Zaken, caminda cu ta promove creatividad y Departamento di Cultura, tin e parti di creatividad ey hopi den nan maneho, pasobra e ta trata di por ehempel un poeta, un autor, un compositor, un musico, un productor. Den e ambito aki nan ta trahando hunto cu Exprodesk, segun Stan Dabian di Departamento di Cultura.
E tayernan ta hopi importante pa mas y mas nos artistanan por saca probecho di nan potencialnan grandi. Tin artista cu hopi talento y e tayernan ta bin cu conocemento riba derecho di autor, cual ta un ley di 1912, cual ta existi caba pa hopi tempo. Pero ta bon pa nan sa y mirando cu tin diferente media, tanto tecnologico y via diferente otro media social, ta bon pa e autor sa su derechonan con pa e  maneha su producto.
Tambe despues di cu abo ta doño di bo obra, ta importante e servicionan cu bo ta brinda cune y loke bo ta haci. Esey ta hopi importante cu Departamento di Cultura, den e caso aki, ta yudando nan. Tin e veld di artista, y conoce hopi di e artistanan y asina ey pa trece e concientisacion den nos pueblo tocante di e bunita proyecto aki, cu ta na beneficio di nos artistanan, Dabian a splica.