Experience San Nicolas lo yena cayanan cu ambiente riba dia di Rey

Diasabra 28 di April e cayanan di San Nicolas lo ta den ambiente di King’s day, dia di Rey. Esaki lo wordo organisa door di e team di Experience San Nicolas, e evento di y pa San Nicolas cu ta tuma lugar tur luna.

Experience San Nicolas ta cuminsa cu e edicion di Dia di Rey cu un Mercado nobo, Sani Market.
Un mercado cu lo ta situa den promenade na San Nicolas den un ambiente caribeño y rondona pa arte. Interesadonan cu kier participa na e Sani Market, e mercado di San Nicolas, por tuma contact cu 5847090 of [email protected]. Muchanan ta participa gratis e biaha aki den e seccion di mercado liber y pa participa tambe mester registra. E mercado ta tuma lugar di 09.00 am – 01.00 pm.


Un actividad perfecto pa conoce San Nicolas (mihor) y den un manera divertido ta e Scavenger Hunt durante Experience San Nicolas. Un actividad cu e biaha aki ta den tema di Dia di Rey. Por sera team di maximal 6 hende cu famia of amigonan. Si ta interesa, por manda un email na [email protected] Prijs pa team ta solamente 10 florin pa participa y e actividad ta di 09.30 am – 11.00 am.

San Nicolas tin un historia rico y ta embeyece door di arte riba caya. Tambe San Nicolas ta cas di dos museo, Museo di Industria y Museo di Comunidad, y di Cosecha San Nicolas cu su tienda di artesania certifica traha door di localnan y su centro creativo. Experience San Nicolas ta ofrece pa esunan cu kier bin tende y mira mas over di esaki un walking tour, San Nicolas Cultural Discovery Tour. Pa por reserva cupo, por manda un email na [email protected] Prijs ta solamente 15 florin pa hende y ta inclui un boter di awa. E actividad aki ta di 09.00 am – 10.30 am.

Kiwanis Club of Palm Beach Aruba ta colabora cu e edicion di Dia di Rey di Experience San Nicolas cu Weganan Popular pa nos muchanan. Na e manera aki, muchanan por participa den weganan popular cu ta parti di nos cultura. Muchanan lo por pasa dushi hunto cu amigonan, primonan of rumanan dilanti Museo di Industria (“Watertoren”). E actividad aki ta gratis y lo ta di 09.00 am – 01.00 pm.
San Nicolas ta preparando su cayanan pa Dia di Rey unda cu tur hende por bin pasa dushi den un ambiente historico, cultural, educativo y creativo. Pa mas detayes tocante e evento mensual Experience San Nicolas, bishita nos Facebook page Experience San Nicolas.