Exitoso siman di preparacion pa pasantia pa studiantenan di Colegio EPI

Studiantenan bon prepara di forma professional ta un di e ideanan di Colegio EPI. P’esey mes Departamento di Pasantia y Directie di Colegio EPI a pone cabes hunto y organisa un siman di preparacion pa studiantenan cu ta preparando pa nan pasantia.

E siman tabata yena di presentacionnan cu hopi informacion importante cu lo por yudanan haci nan pasantia ainda mas miho. Studiantenan a haya informacion tocante etica, comportacion y vestuario profesional, comportacion corecto riba red social y mucho mas. Profesionalnan den cada un di e ramonan aki a presenta pa e studiantenan,  dunando nan informacion valioso cu lo por yudanan haci nan papasantia cu exito. E siguiente personanan a presenta e lecturanan, Dr. A. Vallejo pa MedWork, Sra. Charlene Nectar di Advance HR Learning and Development y Sra. L. Pocorni di Novelty Marketing. Diabierna a cera cu presentacion di ex studiantenan di Colegio EPI cu awo ta profesional den nan trabao. Nan a conta e studiantenan di nan carera escolar pa asina inspira nan. Un danki na Srta. Ruljienne Arends di FADA, Sr. Urvin Leest di Ritz Carlton Aruba y Sr. Rowald Wever como profesional praktijk ondersteunend huisarts (POH) na un huisartsenpraktijk.

Pa culmina e dia Janiro Eisden y Jean Carlo Espinal a tene un presentacion pa asina inspira e hobennan y mustra nan e importancia di sigui bo soñonan y traha duro pa bo meta.

Studiantenan a haya e oportunidad pa siña hopi y asina ta bon prepara pa nan pasantia.

Un biaha mas danki na tur cu a participa pa asina haci esaki un siman sumamente exitoso y educativo. Colegio EPI lo sigui traha pa forma studiantenan professional y cu personalidad.