Den fin di siman di 24 y 25 di november a tuma luga e campeonato internacional di karate, esta ‘Curaçao Open 2017’ organisa pa Curaçao Karate Bond. Na dicho campeonato a participa e karatekanan Janilaine Bello, Glendeline Croeze y Alejandro Gonzalez Lujan di e Asociacion Arubiano Di Karate-Do Shotokai, dojo Shocokan. E experiencia na Corsow tabata dushi. A topa otro paisnan manera Antiyas Hulandes, Trinidad y Tobago, Venezuela, Brazil, Jamaica y Martinique. Janilaine Bello, Glendeline Croeze y Alejandro Gonzalez Lujan a trece en total 5 medaya pa Aruba (1 brons, 2 plata, 2 oro). Nan ta sumamente contento cu e resultado ya cu e ta un muestra di nan dedicacion constante na karate. Tambe e resultado ta un motivacion mas pa nan sigui train duro hunto cu nan instructor ‘Sensei’ Alberto Gonzalez Lujan. Pabien na e tres karatekanan, nan mayornan, famia y amistadnan. Tambe ta felicita Federacion Internacional Shotokai di cual Shotokai Aruba ta forma parti. Mas cu claro, no por keda sin haci uzo di oportunidad pa felicita (pabien!) tur otro karateka cu a truinfa durante di e ‘Curaçao Open 2017’.
