Ex Minister Paul Croes a keda para’riba “Mi no a tuma recompensa”

Ex Minister Paul Croes, na momento di hiba palabra na final di e prome regie-zitting di caso Ibis, a keda para’riba cu e no a tuma ningun recompensa.

El a splica tambe e motibo pakico e no kier a duna un declaración. Mi no por duna un declaración mientras cu mi no ta cu ta dunami un proceso husto. Con por ta posibel cu mi tabata cera y después di e di shete dia pa 9.30 di anochi nan ta trece un dossier pami di 1000 blachi pa mi repasa y pa mi duna un mi declaración e siguiente mainta 9’or ora cu nan ta bay interogami.

El a sigui bisa: con nan kier pami duna un declaración si di e 9 companianan cu nan ta menciona inicialmente den e investigacion, ta resulta cu no ta aparece den e acusacionnan cu tin contra di mi.

El a keda insisti cu tin hopi cos cu no a bay manera un debido proceso ta exigi pa un investigacion y tabatin basta critica contra Ministerio Publico pa e forma con nan a actua den e caso aki. Asina por ehempel, el a bisa, cu OM a papia inicialmente di 2000 ontheffing, y na final den e acusación ta papia di un par di caso di ontheffing cu ta wordo cuestiona. Ademas, ta wordo bisa cu e asunto di e fundación, cu e ta bisa a wordo lanta prome cu el a bira Minister y tambe e donacionnan menciona den acusacionnan a tuma luga prome cu el a bira Minister.

“Nos kier tempo y nos kier tur material pa por prepara nos mes debidamente manera un proceso husto mester ta,” el a bisa Hues.

E sospechoso Paul F.T.Croes ta wordo acusa di:

Corupcion pasivo conhuntamente cu otro of otronan, en contra di su deber den e periodo di prome di januari 2014 te 28 di maart 2017.

Ambtsmisbruik conhuntamente cu otro of otronan den e periodo di 20 di april 2015 te 30 di januari 2017.

Malversacion conhuntamente cu otro of otronan di placa di e fundacion S.L.& E. den e periodo di 18 di december 2014 pa 28 di maart 2017.

Labamento di placa (gewoonte witwassen) conhuntamente cu otro of otronan den e periodo di prome di januari 2014 pa 28 di maart 2017.

Empleo di un persona indocumenta conhuntamente cu otro of otronan den e periodo di 20 di december 2016 te 28 di maart 2017. Pone un persona den ocasion p’e viola LTU den e periodo aki. Mas subsidiario, laga un persona indocumenta traha.

Participacion na un organizacion criminal den e periodo di prome di januari 2014 te 28 di maart 2017.