E ex-funcionario di e federacion mundial di futbol FIFA, e Arubano, Gregory Engelbrecht
recientemente e tene un reunion cu St. Fundacion Lotto pa Deporte riba cierto plannan cu e tini pa yuda e deporte na Aruba. Como un experto Arubano riba e tereno di desaroyo deportivo e la pidi un reunion cu Lotto.
“Nos di Lotto ta masha contento di por sinta cu un experto profesional Arubano y scucha di e
plannan cu e tini pa e mehora nos deporte. Nos ta aprecia cu nos tin cu usa nos mesun
hendenan y no tur ora bini cu hende di afor pa guia nos, pero usa loke nos tin den cas cu
conocimento y su netwerk internacional. E la bini papia cu nos tocante ideanan di projectonan
cu e tin den mente, projectonan tecnico pero tambe projectonan organisatorio. Ta importante pa cambia bida di no solamente nos deportistanan pero tambe nos organisacionnan deportivo, dirgentenan, directivanan pasobra unda bo tin un bon dirigente y directiva bo tin un progreso sostenibel”, Sr. Wernet a bisa.
Den e materia aki bo mester personanan cu experencia y conocimento den e materia aki y
Sr.Engelbrecht sigur ta un di e personanan aki. E lo por ta un persona cu por duna su
contribucion na proyectonan manera WorldCoaches, Mini velden, haci cierto investigacionnan
unda datonan ta bini padilanti, esaki lo mester e bon duna guia paso eynan bo ta mira “facts” y no simplemente opinion. Sin datos bo no por hasi un bon investigacion. Pa Lotto e proyectonan papia ta riba e tereno inovativo, cual sigur ta hala e atencion cu hopi desaroyonan nobo. E concepto di WorldCoaches/Mini velden ta bon mes: aki tin e triangulo di bario, scol y club. E ta yuda nos sociedad hisa su valornan & normanan. Esey tin su effecto sigur riba criminalidad. E pensamentonan ta bon pero ta rekeri mas estudio y planificacion riba esakinan. A lo largo ta e federacionnan, clubnan y atletanan lo mester hasi uso di esakinan, e no ta den man ni di Gobierno y Lotto.
